MOABOT sa tulo ka mga drayber sa multicab ang nagpositibo sa gipahigayong kinalit nga drug test sa Public Utility Vehicle (PUV) terminal sa Pueblo Verde sa Barangay Basak, dakbayan sa Lapu-Lapu kagahapon, Mayo 16.
Ang naasoy nga drug test subay sa “Oplan Harabas” nga gipasiugdahan sa Philippine Drug Enforcement Agency (PDEA) 7 sa pakigtambayayong sa Land Transportation Office (LTO)-7 ug Land Transportation Franchising and Regulatory Board (LTFRB) 7.
Moabot sa 200 ka mga drayber sa multicab ug tricycle ang napaubos sa naasoyng kinalit nga drug test.
Matod ni Ivy Claire Oledan investigation agent 3 sa PDEA-7 nga ang kinalit nga drug test regular na nila nga gibuhat aron masigurong walay mga drayber nga nagumon sa gidiling drugas nga maghatag na hinuon ug kapeligro sa mga sumasakay.
Dungan kini gipahigayon sa tibuok nasod kagahapon, awa Mayo 16,sa mga piniling terminal.
Niadtong miaging Marso, nagpahigayon usab ang PDEA-7 og kinalit nga drug test sa mga bus driver sa terminals dinhi sa Metro Cebu.
“We still have to conduct confirmatory test sa mga nag positive diri kay screening pa man gud ni siya but we already conduct interview sa mga nag positive and then gi-endrose napud sila sa Local Government Unit for CBRP (Community Base Rehabilitation Pogram),” matod ni Oledan.
Usa sa nagpositibo dihang nahinabi ning mantalaan mibutyag nga dako gayud ang iyang pagmahay nga nagpositibo siya sa paggamit og ginadiling drugas.
Iyang giangkon nga mogamit ug ginadiling drugas panagsa apan wala siya magdahom nga duna diay mga kinalit nga drug test sama sa Oplan Harabas.
Nabalaka siyang walay panginabuhian sa higayong ma-revoke ang iyang lisensya.
“Sakit pud oi, nagmahay gyud ko balik na lang ko tambay ani wa may lain panginabuhian,” matod sa drayber nga nagpositibo.
Gibutyag ni Erwin Patalinghug ang acting chief sa operations division sa LTO-7 nga ilang gi-isyuhan ug Temporary Operator’s Permit (TOP) ang nagpositibo sa paggamit ug ginadiling drugas ug giawhag sa pagbisita sa ilang buhatan alang sa posibleng sanction niini.
Pagka-revoke sa lisenya ang gikatakdang atubangon sa mga nagpositibo.
“Sa balaod sa Republic Act RA 10586 naa gyud siyay perpetual revocation kung mag negative siya aw maghimo tag resolusyon nga negative iyang confirmation ato iuli ang iyang lisenysa” matod ni Patalinghug.
Ang kinalit nga drug test mao ang pagsuta sa kaluwasan sa mga pasahero sa publikong mga sakyanan. (GCM)