MOABOT sa 1,735,119 ka mga botante ang nisalmot sa piniliay sa lalawigan sa Sugbo niadtong Lunes, Mayo 13, sumala sa natala sa Commission on Elections (Comelec).
Kini 80.37 porsyento sa kinatibuk-ang 2,158,895 ka mga botante nga narehistro sa probinsya, way labot niini ang mga botante sa highly urbanized cities sa Cebu ug Lapu-Lapu.
Mas daghan ang nibotar sa eleksyon karong tuiga kon itandi sa 1,629,553 ka mga botante sa miaging presidential elections niadtong 2016 ug 1,446,114 nga nibotar niadtong 2013 diin 1,788,498 ang mga botante.
Apan mas taas ang voters’ turnout niadtong 2016 elections nga niabot og 85.6 porsyento.
Sumala ni acting Cebu Provincial Election Supervisor Jerome Brillantes nga daghan ang namotar tungod kay daghan ang nisalig sa seguridad nga ilang gipatuman sa adlaw sa botasyon.
“Atong ikalipay na at least the Cebuanos exercise their right to suffrage. They actively participate sa atoang election. Maybe because of the peace and order sa atong security as well as pag-cascade sa atong election. We are very successful,” pahayag ni Brillantes.
Sigon niini nga na-transmit sa dakbayan sa Toledo ang election returns kapin alas 3:00 sa kaadlawon niadtong Huwebes, Mayo 16.
Ang maong siyudad maoy katapusan naka-transmit sa mga resulta sa piniliay gumikan sa depektuso nga secure digital (SD) cards, hinungdan nga nalangay ang proklamasyon sa mga nakadaug sa pagka gobernador ug bise gobernador sa lalawigan sa Sugbo.
Karon nga nahuman na ang piniliay, siya niawhag sa mga nikandidato nga pangtangtangon na ang nagbitay nga election materials sa mga publikong lugar aron malimpyo ug mahawanan.
Si Brillantes nipahinumdum usab sa mga nikandidato sa pagduso sa ilang Statement of Contributions and Expenditures (Soce) sa dili pa ang deadline sa Hunyo 12.
Sa kinatibuk-an, malinawon ang eleksiyon sa Sugbo.