SECTIONS
Tuesday, May 21, 2019
SUPERBALITA CEBU

Gwen giproklamar; balik Kapitolyo human sa 6 ka tuig

HUMAN sa unom ka tuig, nahibalik sa Kapitolyo si incoming Governor ug incumbent Cong. Gwendolyn Garcia.

Alas 11:30 sa buntag niadtong Huwebes, Mayo 16, naabot si Garcia sa Kapitolyo sul-ob ang puti nga polo ug itom nga denim jeans, kuyog ang iyang campaign team ug mga miyembro sa pamilya.

Si Garcia, nakakuha og 887,290 ka mga botos, ang giproklamar nga maoy nidaog nga pagka gobernador sa lalawigan sa Sugbo. Iyang gipildi si Bise Gobernador Agnes Magpale kinsa nakakuha og 598,567 ka mga botos.

Si acting Cebu Provincial Election Supervisor Jerome Brillantes ang niisa sa kamot ni Gwen atol sa proklamasyon sud sa social hall sa Kapitolyo.

Wa pa gani mahuman ang pag-ihap, si Magpale niangkon na sa iyang kapildehan batok kang Garcia tungod sa kadaku na sa labaw sa kanhi gobernador.

Niadtong Martes, naglabaw na og 250,000 botos si Garcia kang Magpale.

Human sa proklamasyon, namulong si Garcia sa podium ug gipasalamatan ang iyang pamilya, mga higala, tigpaluyo ug kaalyado sa pulitika nga nitabang sa iyang kampanya hangtod nga nakab-ot ang iyang kadaugan.

Sa iyang pakigpulong, ang kanhi gobernador nibalik lantaw sa iyang mga kaagi dihang siya gipahamtangan og unom ka buwan nga suspensyon ni kanhi Presidente Benigno “Noynoy” Aquino III niadtong Disyembre 2012 hangtod sa iyang pagkanaog sa Kapitolyo.

Matod niya, ang gahom nga gikuha gikan kaniya atol sa suspension nga iyang gihulagway nga illegal nakuha og balik gumikan sa gahom sa mga balota sa mga botante nga nipili niya.

“We have won. This is our victory,” pahayag ni Gwen.

Siya nagbilin og mensahe sa iyang mga kaatbang nga nidaot niya sa ilang pagpangampanya.

“To my opponents, learn from this, negative campaigning never works with the Cebuanos. Because Cebuanos are an intelligent electorate. Never again insult their intelligence,” pamulong ni Gwen

Unang giproklamar ang manghod ni Gwen nga si Pablo John Garcia, nabalik sa pagka kongresista sa ikatulong distrito sa Sugbo.

Apil sa nitambong sa proklamasyon, ang ilang 93 anyos nga amahan nga si kanhi gobernador ug deputy speaker Pablo Garcia ug uban nilang mga igsuon. Naa usab ang mga anak ni Gwen nga si Liloan Mayor Christina Garcia-Frasco, kuyog sa iyang bana, umaabot kongresista sa ikalimang distrito nga si Vincent Franco Frasco, ug Paulo Garcia-Codilla.

Apil sa giproklamar si Gobernador Hilario Davide III, nidaog pagka bise gobernador, kinsa nakakuha og 781,312 ka mga botos batok sa iyang kaatbang nga si Daphne Salimbangon nga may 618,828 ka votes.

Naproklamar usab ang mga reelected Cong. Wilfredo Caminero, 5th District Provincial Board Member Miguel Antonio Magpale, 3rd District PB Member Victoria Corominas-Toribio ug 7th District PB Member Christopher Baricuatro ingon man si incoming 3rd District PB Member John Ismael Borgonia. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!