AMAHAN gipusil patay sa uyab sa iyang anak ingon man sa mga kauban niini nga sakop sa Bloods gang.

Ang amahan nangita sa iyang dalagang anak nga niadtong higayuna gikauban sa mga suspek.

For updates from around the country, follow Sun.Star on Twitter

Wa maka-uyon sa relasyon sa iyang anak ug suspek ang biktima.

Kini nahitabo pasado alas 10 sa milabayng gabii sa sityo Manol, Barangay Tisa.

Ang biktima nga namatay human makaangkon og mga daghang samad pinusilan giilang si Richard Niez, 42, usa ka pintor, nagpuyo sa maong lugar.

Mga suspek sa pagpatay giilang sila si Glenn De Guzman, Jonas Flores ug Joaquin Cornejo, uyab sa anak sa biktima, pulos mga sakop sa Bloods gang.

Si De Guzman nadakpan sa kapulisan sulod sa tambalanan human maunay sa armas nga iyang gigamit sa pagpusil.

Si Cornejo nasikop atol sa hot pursuit operation sa kapolisan.

Matod ni PO2 Edario Manatad sa Homicide Section nagbutyag nga nag-inom ang mga suspek uban sa anak sa biktima nga ginganlan og “Nina,”usa ka menor de edad.

Niadtong higayuna adlaw nga natawhan ni De Guzman mao nga nangdapit og inom sa iyang mga kauban.

Kalit lang niabot ang biktima nga nangita sa iyang anak nga daling nitago sa dihang niabot ang amahan.

Gitubag kini sa mga suspek nga wa sila masayod kon asa ang iyang anak, hangtod nga nahitabo ang lalis.

Wa magdugay, nadungog na lang sa mga tawo ang sunodsunod nga mga buto sa armas de fuego hangtod nga natumba ang biktima nga samaron.

Human sa hitabo, daling nisibat ang mga suspek ug ang biktima wa na madala pa sa tambalanan.

Nakadawat og taho ang kapolisan nga naunay usab sa iyang armas si De Guzman human mahitabo ang linayogay.

Pagresponde sa kapulisan, naabtan si De Guzman nga nagpatambal sa iyang samad sa tuo nga batiis.

Samtang si Cornejo nitahan human nilusad ang kapolisan og hot pursuit operation sa Barangay Kamagayan.

Si Cornejo nga nahinabi sa Sun.Star Superbalita niingon nga siya nagbasol sa gibuhat sa iyang mga kauban nga mipusil patay sa amahan sa iyang uyab.

Iyang gitumbok sila si De Guzman ug Flores nga maoy namusil, samtang si De Guzman mialigar usab nga ang namusil mao sila si Flores ug Cornejo.

Ang gipangita na lang karon sa kapulisan mao si Flores.(JFT)