NITANYAG og dialog si Engr. Augusto Corro ngadto sa kampo nila ni Daanbantayan Mayor Sun Shimura ug Vice Mayor Ma. Luisa Loot alang sa malinawon ug hapsay nga transition.

Apan, gisalikway kini sa kampo sa inahan ug anak nga mayor ug bise-mayor.

For updates from around the country, follow Sun.Star on Twitter

Giangkon ni Corro nga human makita ang kaisog sa iyang mga supporters, nadasig na gyud unta siyang mosulong sa munisipyo niadtong Miyerkules.

Matod niya nga atol sa ilang gihimong rally duna silay mga dos mil ka mga supporters samtang ilang nakita nga kapin sa gatos lang ang mga supporter sa mga Loot nga didto sa munisipyo.

“Ang mga tawo isog na kaayo ug gusto silang mo-take over na mi kay kahibalo silang dugay na gyud kaayo ning kasoha,” nagkanayon si Corro sa telephone interview sa Sun.Star Superbalita.

Apan gitambagan siya ni Bogo City Mayor Junie Martinez nga di kini buhaton aron malikayan ang kagubot.

Matod ni Corro nga andam siyang makig-estorya sa kampo ni Loot kon pareho gyud ang ilang tinguha nga alang sa kaayohan sa lungsod ug katawhan.

“Ang anak willing pero ang inahan maoy dili kay ang inahan may magbuot gud,” pagtug-an ni Corro.

Apan, si Loot nisalikway ning tanyag ni Corro atol sa ilang gipatawag nga press conference.“Ingna siya unya na lang human sa eleksyon mi mag-dialog,” matod ni Loot.

Niaghat sab si Loot kang Corro sa paghuwat na lang nga mahuman ang eleksyon sa Mayo ug di magdali-dali sa paglingkod.

Samtang, si Department of Interior and Local Government (DILG)7 director Pedro Noval Jr. subling namahayag nga hangtod karon sila si Shimura ug Loot gihapon ang ilang giilang mayor ug bise mayor sa lungsod bisan pa man kon ni-take oath na sila si Corro ug ang bise mayor niining si Dr. Jose de Leon.

Niadtong Miyerkules sa hapon nadawat ni Noval ang fax message gikan ni RTC Judge Antonio Marigomen nga nagmando kaniyang ipa-hold in abeyance ang pagpatuman sa giluwatan niining writ of execution.

Nasayran nga wa gi-serve ni Noval ang kamandoan ni Marigomen kay gihuwat pa niini ang tubag gikan sa huwes sa iyang gipangayong katin-awan kay base sa lagda sa korte, di pa makonsiderar nga final ang desisyon kon duna pay pending nga motion for reconsideration.“ ...considering that there is an attached motion for reconsideration to your letter which the undersigned takes judicial cognizance, the implementation of the writ of execution dated Feb. 22, 2010 is held in abeyance pending the resolution of the motion for reconsideration by the Comelec,” nagkanayon ang unod sa suwat ni Marigomen kang Noval.

Hinuon bisan niini, si Corro ni-function na isip mayor sa lungsod ug niluwat na sa labing unang executive order alang sa tanang department heads nga modusog report. (CPL/dugang ni REV)