SUPERBALITA CEBU

Honorarium sa magtutudlo sa Mandaue gihatag na

CEBU. Usa sa mga magtutudlo sa Mandaue nga nisilbi isip electoral board chairperson sa May 13 elections ang nikubra na sa ilang honorarium, Biyernes sa buntag, Mayo 17. (Fe Marie Dumaboc)

NADAWAT na ang honorarium alang sa mga magtutudlo sa Dakbayan sa Mandaue nga niserbisyo atol ning tuiga nga piniliay, Biyernes sa buntag, Mayo 17.

Usa sa daku nga gipasalamat sa mga magtutudlo nga cash na kini, apan nakadismaya lang kanila kay aduna kini deduction, kay gibuhisan.

Human nga nakuha sa Commission on Elections (Comelec) sa Dakbayan sa Mandaue ang kwarta gikan sa kauluhan alang sa allowance sa mga magtutudlo niadtong Miyerkules, Mayo 15, ang P7.4 milyones pesos alang sa 1,408 ka mga magtutudlo nga niserbisyo.

Dali nga gibahig sa mga kawani sa Comelec ang kwarta, hinungdan nga sugod alas 8 Biyernes sa buntag, nadawat na sa pipila ka mga magtutudlo ang ilang honorarium.

Gitug-an ni Evelyn Cueva, ang assistant election officer, nga gi-schedule sa Comelec sa Mandaue ang pag-release tagsa ka-oras alang sa matag barangay aron dili mag-huot ang mga magtutudlo o maglinya og dugay sa cashier area sa Comelec.

Magpadayon ang pag-release, Sabado, Mayo 18 ug Lunes, Mayo 20 gikan sa alas 8 sa buntag hangtud sa alas 6 sa gabii.

Mapasalamaton na ang mga magtutudlo kay kompara sa mga niaging piniliay nga ilang pagserbisyo, naabtan pa og usa ka semana, una nila nadawat ang allowance.

Sa niagi nga tuig atol sa ilang pagserbisyo sa barangay election, gipaagi og cash card, diin nakasugat kini og mga problema sama nalang nga walay sulod ang cash card, maabtan og offline ug uban pa nga kalangay.

Usa lang sa nakapadismaya sa mga magtutudlo ning higayuna, kay unang higayon nga gikuhaan pa og 5 porsyento isip buhis, ang ilang mga honorarium.

Ang mga chairperson sa electoral board ang makadawat unta og P7,000 apan P6,650 nalang, human na nga gikuhaan kini og P350 nga buhis.

Alang sa poll clerk ug electoral board member makakuha sila og P5,700, P4,750 alang sa mga Department of Education Supervisor Official ug P2,850 alang sa mga support staff.

Nitug-an si Francis Marie Certifico ug Divina Gomez, duha sa mga chairman sa electoral board sa Barangay Casuntingan, nga daku na nga tabang ang honorarium alang na sa paliton nga mga kinahanglanon sa ilang mga anak para sa umaabot nga pag-abli sa klase.

Kini aron sab magamit sa paggasto alang sa assigned nga classroom, ilabi na nga magsugod na usab ang brigada eskwela.

“Pasalamat na gyud mi kay, naka-serbisyo pa mi, naa pa mi allowance, boluntaryo ra man gyud ni amo,” asoy ni Divina Gomez sa Superbalita Cebu.

“Daku na kaayo ni nga tabang kay para sa school supplies sa akong bata, kay opening na hapit sa klase and para sad sa materials diha sa classroom,” gitug-an ni Certifico.

Alang sa mga magtutudlo nga dili makakuha sa ilang honorarium, atol unta sa ilang schedule, ang mahimo kini nga makuha sa Comelec Mandaue office sa Mayo 22. (Superbalita Cebu)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph