DAVAO DEL SUR -- Miani og makabungog nga boto sa probinsiya ug silingang Davao Occidental ang mga senatorial candidates nga lumad sa Davao region.
Si Senator-elect Ronald "Bato" dela Rosa maoy numero unong gisuportahan sa Davao Occidental nga miani og 70,815 boto samtang anaa pa sa 78.22 porsiyento ang naihap nga Election Returns (ERs).
Nagsunod kaniya si kanhi special assistant to the President (SAP) ug Senator-elect Christopher Lawrence "Bong" Go nga nakakuha og 69,549 boto.
Nag-una sab si dela Rosa sa balwarte niining probinsiya sa Davao del Sur sa boto nga 219,740.
Ikaduha sab si Go nga miani og 215,568 boto.
Si dela Rosa nga lumad nga taga Barangay Bato, Sta. Cruz, ang nag-una sa iyang balwarte sa boto nga 33,886 ug ikaduha si Go sa boto nga 31,188.
Apan sa dakbayan sa Davao, si Go maoy numero uno sa iyang balwarte nga gihatagan sa mga Dabawenyo og boto nga 533,550 human naihap ang 100 porsiyentong ERs.
Ikaduha lamang si dela Rosa sa dakbayan nga adunay botong 518,778.
Samtang dako ang pasalamat ni dela Rosa ug Go sa mga katawhan sa Davao region nga mihatag kanila og makabungog nga suporta ug pulos misaad nga himuon nila ang tinud-anay nga pag-alagad sa publiko. (Orlando B. Dinoy)