COTABATO CITY -- Naproklama na isip pinakauna nga babaye nga gobernador sa Maguindanao si Bai Mariam Sangki Mangudadatu.
Nakakuha og 253,764 nga boto si Bai Mariam batok kang Mangudadatu Mayor Freddie Mangudadatu nga dunay boto nga 198,365.
Daug sab sa iyang katapusan nga termino isip vice governor si Datu Lester Sinsuat sa boto nga 323,181 kay walay kontra.
Naproklama sab nga mga board members sa unang distrito sa probinsiya nga mao sila Sharifudin Mastura, dunay boto nga 162,184; Mashur Biruar, 132,124; Datu Sharif Diocolalno, 124,452; Datu Bimbo Sinsuat Sr., 122,105; ug Laila Dagalangit, 102, 758.
Daug sab sa board members sa 2nd District sila King Mangudadatu nga dunay boto nga 103,324; DJ Parok Mangudadatu, 100,892; Glenn Piang, 67,195; Bobby Midtimbang, 62, 287; ug Jofner Angas, 60, 205.
Sa pagka-kongresista sa 1st District si Datu Roonie Sinsuat Sr. nga dunay boto nga 125,481; 2nd District Congressman elect nga incumbent governor nga si Esmael Mangudadatu nga dunay boto nga 124,385.
Si Governor Elect Bai Mariam maoy pinakauna nga babaye nga gobernador sa probinsiya nga napili pinaagi sa eleksiyon ug nag-inusara nga lady governor sa bag-ong Bangsamoro Autonomous Region in Muslim Mindanao (BARMM).
Makonsidera sab sa tibuok nasud nga kasaysayan ang kadaugan ni Bai Mariam gumikan sa mag-asawa nga nidaug nga gobernador sa managlahing probinsiya.
Ang mister ni Bai Mariam nga si Incumbent Sultan Kudarat Congressman Suharto "Teng" Mangudadatu nidaug nga gobernador sa SuKu. (Edgar E. Fuerzas)