DAW sama sa na-scam ang libuan ka mga tawong nakigdinutdutay, milinya og sayo aron lamang makapalit sa naka-sale nga cellphone, Biyernes sa buntag, Mayo 17, sa usa ka mall ning dakbayan sa Davao.
Apan kalit lang nakadesidar ang management sa maong tindahan nga manira na lang kay wa kasagang sa kadaghang tawo nga midugok.
Sayo pa lang sa buntag, nagsugod na ang pila sa daghang Dabawenyos, lakip na mga dayo nga buot mo-avail sa Summer Clearance Sale sa 8telcom sa SM City Ecoland, dakbayan sa Davao.
Sa Facebook video sa usa ka Odessa Umusig, makita nga nagkaguliyang ug naglumbaanay og panaka ang mga tawo sa elevator aron makauna sa linya, makapalit dayon sa naka-sale nga cellphones.
Apan tungod sa wa damhang pagdagsa sa tawo, midesisyon ang management sa 8telcom ug SM City Davao nga di ihinayon ang sale.
"DUE TO UNFORSEEN ISSUES 8TELCOM MANAGEMENT DECIDES TO CANCEL THE SALE TODAY. 8TELCOM SM CITY DAVAO WILL BE CLOSED TODAY MANAGEMENT WILL POST NEW SCHEME FOR TOMORROW AS WE WILL RESUME TOMORROW AND SUNDAY. THIS IS FOR THE SAFETY OF EVERYONE. WE APOLOGIZE. THANK YOU," ang unang post sa tindahan.
"KABALO BAMO GIKAN PAKOG CAGAYAN! IPA SIRADO KUNANG BRANCH NINYO," yawyaw sa usa ka Nikka Coyoca sa Facebook.
"I WAS THERE, PURYA GABA INYONG SISTEMA, INFO ARE NOT CLEAR OG MISLEADING PWEH," segunda sab ni Dee Alex Mikaelson.
Dugang pa, "sayang among hagu ni absent pa mi pra maka avail anang sale ninyo..wala nalang unta mo nag post2 paasa!" ni Van Es Sa.
Pagka-hapon, nag-post og laing advisory ang management sa 8Telcom dungan sa pagpangayo og dispensa nga wala sila makasilbi tungod sa "uncontrolled crowd."
Gidugang nila nga nakigkoordinar sila sa SM City Davao aron mahimo kining sale nga malampuson sa mosunod nga higayon.
"We will temporarily close to ensure everyones safety. We appreciate all the efforts from customers who came from outside of Davao City, rest assured we will have a better event next time," pahayag sa kompaniya.
Ang 8telcom mipahibalo pinaagi sa Facebook page nila nga sila mag-Summer Clearance Sale gikan Mayo 17-19, diin mga smartphones, ug uban pa ibaligya nga may halos 80% nga discount.
Subay sa ilang announcement, ang mga ibaligyang units mga "slightly used items.""