GISUBHAN ug gi-blessingan karung Biyernes sa buntag, Mayo 17, ang bag-o ug mas hamugaway nga buhatan sa Traffic Enforcement Unit sa Lapu-Lapu City Police Office (LLCPO).
GIHULAGWAY nga mas mamahimo nga epektibo ang mga pulis trapiko sa LLCPO sa gihatag nga tabang sa kagamhanan sa siyudad sa Lapu-Lapu.
Gawas sa bag-ong buhatan, pormal sad gipang- turnover ang dugang upat ka mga dagkong motorbike nga magamit alang sa mga gitawag nila nga 'Speed cops'.
Ang maong mga proyekto gikan sa kagamhanan sa dakbayan sa Lapu-lapu, nga gigahinan og pundo nga dul-an sa P4 milyones, sa outgoing mayor ug incoming lone district representative Paz Radaza.
Gitug-an ni Police Major Jimmy Fortes sa TEU sa LLCPO nga daku kini nga tabang, diin niadto pa 2017 nga gihangyo nila ngadto sa lokal nga kagamhanan.
Matud usab ni Police Lt. Col. Regie Real, ang deputy LLCPO director for administration, nga gamit kini dili lang pagtabang pagsulbad sa problema trapiko, apan alang usab sa paggukod sa mga kriminal.
Ang dugang upat nga mga motorsiklo nga magamit sa ilang gitawag og Speed cops, maoy motabang sa mga sakop sa City Traffic Management System (CTMS) diha sa pag-man sa trapiko sa siyudad.
Aduna nay 9 karon nga motorbike ang TEU sa LLCPO alang sa 18 ka personnel.
Mismo si Radaza ang nangulo sa inauguration ug pag-turn-over sa maong buhatan ug mga motorsiklo ngadto sa LLCPO.
Apan awhag ni Radaza sa mga motorista, lakip na ang publiko nga bisan pa sa kanunay nga paglambo sa mga programa sa pagsulbad sa trapiko, nag-una nga solusyon niini mao gyud gihapon ang disiplina sa matag usa. (FMD)