NIMANDO si Talisay City Mayor-elect Gerald Anthony "Samsam" Gullas Jr. sa iyang mga sakop ug supporters nga ipalangkat ug ipang-recycle nalang ang mga campaign posters niya ug sa iyang apohan nga si First District congressman-elect Eduardo Gullas Jr.
Boluntaryo nga gipalangkat sa mag-apohan nga Gullas ang ilang mga campaign posters nga nagpasad sa dakbayan sa Talisay human sa malampuson nga piniliay niadtong nakalabayeng Lunes, Mayo 13.
Matod ni Gullas nga wala na sila nagpaabot pa nga ang Commission on Elections (Comelec) na mismo ang motawag sa ilang atensiyon aron pangwaon ang mga posters.
"You know ang Comelec daghan na kaayo sila ug gilihok rong panahuna busy kaayo and gawas ana obligasyon man gayod na namong mga nagpapili sa nilabayng election nga langkaton ang among mga posters human sa piniliay," sigon sa batan-on Gullas.
Samtang ang iyang apohan nga si Eduardo Jr. dali nga nipatawag sa iyang mga taw ug mga volunteers nga tangtangon na ang ilang mga posters sanglit nahuman na ang election.
"Lain kaayo paminawon nga kita maoy nagpabutang sa mga capaign ads unya paghuman sa piniliay laing taw ang mohipos," sigon sa 83-anyos nga outgoing mayor ug umaabot nga kongresista.
Dugang sa outgoing mayor nga aghaton usab niya ang ubang mga politiko sa Talisay sa pagtangtang sa ilang mga posters nga nagpasad sa nagkadaiyang dapit sa dakbayan.
Subay niini nanghinaot sila sa mga kandidato sa nilabayng piniliay napilde man ug midaug nga unta mohimo pud sa maong lakang aron mapabiling limpiyo ang palibot hilabe na gayod kadtong mga posters nga gipatapot sa mga kahoy.
Kahinumduman nga sa mga nanglabayng eleksiyon usa sa mga problema nga gisagubang sa mga hingtongdan buhatan sa goberno human sa piniliay mao ang paghipos sa mga nagkadaiyang campaign posters.
Sa usa ka opisyal nga pamahayag, giawhag ni Comelec spokesperson James Gimenez nga tantangon sa mga kandidato sa niaging election ang ilang mga posters ug tarpaulin.
Sa niaging Pebrero, nilusad ang Comelec ug kampanya lukop nasud sa pag-ibot ug mga posters ug campaign materials nga giplastar sa lugar nga dili designated posting areas.
Nipasidaan ang Comelec sa mga kandidato nga kung madakpan ang ilang mga posters ug campaign materials nga wala nakaplastada sa designated posting areas, posibleng mag-atubang sila ug kaso tungod sa paglapas sa Omnibus Election Code. (JKV)