IPATUMAN unya sa administrasyon ni Mayor-elect Edgardo Labella ang massive dredging kun pagpalawom sa mga canal ug sapa sa Dakbayan sa Sugbo para di na moawas ang tubig nga moresulta sa grabeng baha atol sa pagbunok sa uwan.
Apan ang iyang malungtaron nga solusyon mao ang pagpangayo sa ideya sa mga eksperto nga enhinyero alang sa pag-umol sa comprehensive master drainage plan.
Gibutyag ni Labella, kinsa moasumir sa katungdanan sugod Hulyo 1, para mapatuman ang massive dredging, iyang hangyuon ang mga regional agencies ug national government nga moabag sa Cebu City Government para sa maong katuyoan.
“I am even planning to ask the engineering batallion of the Philippine Army and all other agencies in government for us to take a massive dredging of our waterways,” pasabot sa bag-ong napili nga mayor.
“After we have cleaned and cleared our waterways, we will undertake a very vigorous city policy to prevent the return of garbage,” dugang niya.
Ang kasamtangang bise mayor niingon nga iya usab hangyuon ang mga barangay opisyal sa 80 ka mga barangay, kaalyado o kakaatbang sa pulitika sa paghiusa aron makab-ot ang limpyo ug hapsay nga dakbayan.
No landfill
Kon siya ang matuman, gusto sa bag-ong napili nga mayor nga way landfill ang Cebu City gumikan sa kadaghan sa mga tawo nga namuyo ug maoy apektado sa kabaho sa basura.
Ang pamahayag ni Labella nitumaw human siya nakadawat og daghang reklamo gikan sa mga residente sa Barangay Talamban, Bacayan, Pit-os ug Binaliw human nisugod na og operate ang ARN Builders sa ilang private landfill sa Binaliw.
“There should be no landfill in the City of Cebu. Anyway there are other local government units which are willing to provide us and accept our garbage such as Consolacion and Aloguinsan,” dugang ni Labella.
Iyang gipadayag nga kon masuta nga nameligro ang maayong panglawas sa libuan ka mga pamilya nga nagpuyo sa maong mga barangay, ipatigbabaw ni Labella ang general welfare clause nga nalatid sa Local Government Code nga posibleng ikasirado sa maong landfill.
Ang Cebu City Government, sa di madugay, mo-award sa P65 million nga bayad sa paglabay sa basura ngadto sa landfill sa Binaliw para maoy labayan og basura hangtod sa Disyembre.
24 hour collection
Para sa epektibo nga pagkolekta sa basura, naglaraw si Labella nga ipatuman ang 24 oras nga pagkuha sa basura diin sa adlaw mao ang mga gagmay nga garbage truck ug sa gabii mao ang dagko nga mga truck maoy mohakot.
Gusto niyang ipatukod ang laing duha o tulo ka garbage transfer station para sayon ra ang paghakot sa basura.
Kon adunay igo nga kwarta ang City Government, subling mamalit og garbage truck ang City Hall ug ihatag ngadto sa 80 ka mga barangay.