MOABOT ngadto sa 19 ka mga drug personalities ang nangasikop sa Philippine Drug Enforcement Agency sa duha ka drug den sa Barangay Duljo Fatima sa siyudad sa Sugbo ug sa Barangay Lower Candulawan, Siyudad sa Talisay, Biyernes sa hapon, Mayo 17.
Sa Duljo Fatima, 14 ang nangasikop diin usa niini mao ang giingong drug den maintainer nga si Rowena Barboza, lakip na ang iyang kauban nga usa ka menor de edad.
Naaktohan sa mga ahente sa PDEA-7 ang 12 ka tawo sa sulod sa drug den nga nag gamit og shabu.
Lakip sa nasikop mao silang Bernie Prajes, Ricardo Mancao, Virgilio Monterde Jr., Rodney Bohol, Leian Paul Pruitt, Randy Estaño, Ruben Portillano Jr., Jomar Cubrado, Rico Pruto, Joseph Villaver, Arnle Alilong ug Winstons Allaso.
Sa siyudad sa Talisay, nadakpan usab si William Bacatio nga maoy nagpadagan sa drug den lakip na ang iyang igsuon nga si Roldan Bacatio.
Nasakmit ang 44 ka pakete sa shabu, motimbang og 13 gramos ug mga nagkadaiyang drug paraphernalia.
Matod ni Leia Alcantara information officer sa PDEA-7 nga usa ka semana nila nga gipanid-an ug mihimog case build up sa duha ka drug den.
"Around one week case build up ang duha ka dens. Info came from concerned citizens. Si Barboza sa Duljo maka dispose og more or less 30 grams per week while si Bacatio sa Talisay more or less 15 grams per week,” matod ni Alcantara. (AYB)