KAUSABAN maoy pirmanenting butang sa politika gawas sa isyo, personal nga interes ug ang dagway sa opisyal. Amigo kaniadto kontra na karon. Kontra kaniadto amigo na. Hinoon maalim ra ang samad sa politika.Tandem sila si Mayor Tomas Osmeña ug Vice Mayor Mike Rama sa tulo ka sunod-sunod nga termino nga karon higpit nga kaaway. Mary Ann delos Santos nakaalagad og 29 ka tuig sa Lahug isip konsehal ug kapitan alalay sa Barug ni kanhi Mayor Alvin Garcia sa 2000, misangka ni Mayor Osmeña sa 2007 apan napilde, midagan pagka kongresista sa 2010 apan napilde ni Rachel del Mar, konsehal sa north district sa 2013, kalit nga miipon sa BOPK sa 2015 nga midaog pagpasubli sa 2016, karon running mate na ni Osmeña kontra ni Mike nga maoy nagpadagan niyag konsehal sa 2013. Si Vice Mayor Edgar Labella nga kaniadto tawo ni Osmeña mao nay nagsangka pagka mayor.
Kauban si Gwen Garcia ug Agnes Magpale apan mao nay nagribal pagka gobernador. Willy Caminero ug Ronie Sesante nga amigo sa mayor pa sila apan maoy nag-atbang pagka kongresista sa second district.
Sonny Osmeña ug Tony Yapha hilabihan kasuod apan kontraryo na kaayo sa third district. Joy Perales miatbang pagka mayor sa Toledo ni Daydee Espinosa-Zambo nga maoy nag-agak sa politika sa magtiayong Perales. Kaalyado kaniadto si San Francisco Vice Mayor Al Arquillano Jr. ug Konsehal Hector Capao nga nag-atbang pagka mayor. Jonas Cortes ug Luigi Quisumbing nga kaniadto naghiusa batok sa mga Ouano mao nay init kaayo nga nagsangka pagka mayor sa Mandaue samtang si Lolypop Ouano nga nagkongresista sa sixth district mao nay gipaluyohan ni Cortes. Boy Radaza ug Ahong Chan nga usa ra ka kampo kaniadto mao nay nagtigi pagka mayor sa Lapu-lapu. Samtang si Paz Radaza nagkontra sila Atty. Eugene Espedido.
Dili usab ikatingala kay sa politika magbungol ang pamilya. Jinggoy Estrada ug half-brother JV Ejercito nagkabikil kay si JV midala sa bansagong Estrada. Makati Mayor Abigail Binay nga nagpasubli gikontrahan sa iyang manghod nga si kanhi Mayor Junjun Binay. Sa ubang dapit nagkontra ang mga ginikanan ug anak. Dunay nagbulag nga magtiayon kay lain-lain ang kandidato nga gilabanan.
Humana ang politika hunongon na ang panagbingkil. Motutok sa mga bulohaton nga gisaad sa pagpangampanya. Mangalagad nga walay pagpihig. Mga napilde mobulig sa mga nakadaog inay motinil og kaligotgot. Ihiklin ang pagdumot kay dali rang maalim ang linabayay og isyo sa politika nga sama ra sa sundang nga gitigbas sa dagat walay samad. Ang panagsakbang maoy ehersisyo ug dugokan sa demokrasya. Busa gakson ang kamatuoran kay ang kapildihan maoy kadaugan sa pagsulay. (csa_1156@yahoo.com/09064648954)