SAYOD kita nga ang hinanok ug insaktong oras sa pagkatulog importante aron mama-ayo ug produktibo imong adlaw.
Kung makuwangan ang katulog ug pahuway, seguradong magduka, maglabad ang ulo, kasukaon, magluya, way umoy ug kusog, iritabli ug daling saputon.
Pito o walo ka oras kada gabii ang gikinahanglan aron ma himsog nga mosugat sa bag-ong adlaw sa pagpanlimbasog.
Matod ni Jessica Jacobs, usa sa mga contributor sa Remedy Daily, kining mosunod nga mga tips makatabang aron mama-ayo ang pagkatulog:
Una, ipalayo o tangtanga ang mga hiramintas sa pagkatulog nga maoy nakaingon sa insomnia sama pananglitan sa gahi nga unlan, subra ka baga o subra ka nipis sa habol, baho o hugaw nga sinina nga pangkatulog, side effects sa mga tambal nga gi-inum, allergies, ug stress nga nadala hangtod sa pagkatulog.
Sunod, kining posisyon sa pagkatulog. Kung ikaw maghagok, mas maayo nga magtakilid matulog kay sayon paglahos-lahos sa mosulod ug guwa nga hangin sa lawas. Kung maghayang, ang baba kasagaran mo-abre maong mas mo kusog ang paghagok.
Suwaye og katulog nga magtakilid sa imong wala nga bahin kay kini makatabang sa pagsulod sa hangin paingong sa baga kay sa magkob o maghayang . Gawas ini, mas paspas sab nga mo biyahe ang imong kinaon gikan sa small intestine ngadto sa big intestine, bisag mga 10 minutos lang, aron di ma ‘food coma’.
Tistingi sab pagpaminaw ang mga relaxing o Spa nga mga sonata kay kini makapa-aghat pagkatulog .
Likayi ang banha, paspas o sing along nga mga sonata kay maka-ingganyo hinuon kini sa pagkanta.
Dako og kalainan kung maka exercise ug maka shower una matulog kay seguradong maka-hinanok.
Likaye ang ilimnong dunay Caffeine ug alcohol kay seguradong magmata-mata ka ini sa tungang gabii.
Paggamit og nightlight aron ma ingganyo sa pagkatulog kay ang subrang kahayag ug saba nga palibot makapasamot og pasiga sa mata.
Ayaw palabi og pabusog una matulog kay kuyaw kini sa urom kay wa kahilisi sa gikaon.