MIBILIB si Cleveland Cavaliers rookie Collin Sexton sa abilidad ni San Miguel Beermen center June Mar Fajardo.
Si Sexton personal nga nagtan-aw sa deciding Game 7 sa Philippine Basketball Association (PBA) Philippine Cup finals series niadtong Miyerkules, Mayo 15, diin giagak ni Fajardo ang Beermen sa ikalima niining sunod-sunod nga Philippine Cup title.
Ning maong duwa, ang Sugbuanong higante mikulit og kasaysayan sa dihang nakalangkat kini’g 31 ka rebounds, labing daghan nga nahimo sa usa ka lokal nga magduduwa sukad masukad.
“The big guy, I think he had like 31 rebounds. He was a monster down there,” matod ni Sexton kabahin kang Fajardo sa iyang pagpakighinabi sa Spin.ph.
Si Sexton ania sa nasod alang sa Jr. NBA National Training Camp nga gisugdan niadtong Sabado.
Gipasabot ni Sexton nga nalingaw siya’g tan-aw sa duwa diin munasginhawang mingdaog ang Beermen batok sa Magnolia Ang Pambansang Manok Hotshots, 72-71.
Si Sexton, kinsa maoy 8th overall pick sa 2018 NBA Rookie Draft, nag-average og 16.7 puntos, 3.0 assists, ug 2.9 rebounds sa primirong season niya sa NBA.