LUYO sa presyur nga mapakita pa ang ilang abilidad, ang host, Private Schools Athletic Association (Prisaa)-Davao malaumon nga mapabilin nila ang ikatulong pwesto sa pagbukas sa National Prisaa Games (NPG) 2019, alas tres sa hapon, Dominggo, Mayo 19 sa University of Mindanao (UM) track oval sa Matina, Davao City.
Si National Prisaa president Ma. Lita Montalban, nga pangulo sa Davao City Prisaa ug Prisaa 11, nagkanayon, nga ang Davao region ikaduha sa high school division ug ikatulo sa college division.
“Whether we move or maintain, we’re praying bahala na di makuha ang number one basta successful lang ang conduct of the National Prisaa Games,” suma niya sa Davao Sportswriters Association (DSA) Forum sa The Annex sa SM City Davao, Huwebes.
Si Prisaa-Davao executive director Joaquin “Boy” Sarabia sa iyang kabahin, nagsulti nga mas maayong di mohimo og prediksiyon, apan dugang niya, ang rehiyon nanukad na sa PNG.
Kahinumduman nga ang Davao region nangharus og 83 ka bulawan, 76 ka silver ug 106 ka bronse aron mabutang sa ikatulong pwesto sa NPG 2018 nga gihimo sa Tagbilaran City, Bohol.
Ang Western Visayas maoy overall champion nga mihakot og 219 ka bulawan, 110 ka plata ug 107 ka bronse samtang ang Central Visayas mikolekta og 194 ka bulawan, 92 ka silver ug 73 ka bronse.
Si Sarabia nagdugang, “Our best finish in the National Prisaa Games so far was second in Zamboanga before.”
Ang Davao region maoy defending champion sa men’s baseball, women’s basketball ug men’s sepak takraw.
Anaa sa 19 ka isports ug lima ka academic ug cultural events ang apil sa kompetisyon nga gisuportahan sa Philippine Sports Commission (PSC), Department of Education (Deped), Commission on Higher Education (Ched) ug City Government of Davao.
Ang SunStar Davao mao say official media partner sa NPG 2019.
Ang pagsubay sa nagkadaiyang kalihukan sa Prisaa nahimong posible kauban ang major sponsors Matina Enclaves, Santos Land Development, 8890 Holdings, Inc., Anflocor, Sky Cable ug Pagcor.
Minor sponsors Aeon Luxe Properties, Davao Doctors College, GH Office Depot, Grand Land, Inc., Alu Hotel, Davao Medical School Foundation, NCCC ug Office of the Special Assistant to the President.