KANIADTONG Mayo 15, aduna akoy gitubag nga imbitasyon sa usa ka debut o pagsaulog sa ika-dise otso nga katuigan alang sa mga babaye.
Akong gikalipay ang pag-apil nianang selebrasyon tungod kay usa ka importante ug mahinungdanon ang pagsaulog sa dalaga sa iyang ika-18 nga edad, ug sa among pagkasuod.
Sa maong engrandeng selebrasyon, akong nakita ang kalipay sa mga mata sa celebrant ug sa iyang mga ginikanan. Bisan pa dako-dako ang gasto tungod sa engrandeng selebrasyon, apan nagkaigo lamang gayud sa pagka-importante sa kinabuhi sa celebrant, ang pagselebrar sa pagkamaayo sa Diyos kaniya sa sulod dise otso ka mga tuig.
Sa akong mensahe nga gipahat, aduna koy tulo ka mga punto nga gipahat sa matahom nga celebrant. Ug ako nagatoo nga kining mga punto makatabang usab kanimo, higala, sa imong paglakaw ngadto sa imong ugma.
Ang primero mao ang Fear of God. Ang kahadlok sa Diyos maoy pundasyon sa usa ka maayo nga kaugmaon. Matud pa sa Proberbio 1: 7, “Ang kahadlok ngadto sa Dios maoy sinugdanan sa ihibalo.” Ang Diyos maoy nagplastar sa tanang kasuguan nga maoy giya nga sundon sa tawo. Ang pagsunod niining mga kasuguan maoy maghatag og kahapsay sa atong kinabuhi.
Ang ikaduha mao ang Faith in yourself. Ang imong pagsalig sa imong kaugalingon maoy ikaduhang balon nga imong angkunon sa imong pagbiyahe sa imong kinabuhi. Ang pagsalig nimo sa imong kaugalingon maoy imong kusog nga magapalahutay kanimo sa imong mga pagdaug sa tanang pagsulay. Kung mawad-an ka og pagtoo sa imong kaugalingon, segurado nga motiurok ang imong kasing-kasing ug ang imong kinabuhi.
Ang pagsalig nimo sa imong kaugalingon mao say makahatag kanimo og daghan pang mga talento o eskilo.
Kung ikaw magasugod sa pagduda sa imong kaugalingon, ikaw magaluya sa imong pagpaningkamot. Apan kung nagatoo ka nga imong mahimo ang imong gustong himoon, magasugod ikaw sa pag-angkon sa mga kadaugan sa imong kinabuhi. Faith in yourself maoy ikaduha nga dapat nimo balonon sa imong pagtubo sa kinabuhi.
Ang ikatulo mao ang Forgiveness. Ang kapasayloan maoy makahatag kanimo og kalinaw, kalipay, ug kagaan sa kinabuhi. Mao kini ang makatangtang sa mga kaguol, kasakit, kabug-aton nga ginakarga sa imong kasing-kasing.
Pasaylo-a ang imong kaugalingon.
Kung ang Diyos makapasaylo kanimo, kinsa ka nga magsilot sa imong kaugalingon? Dawata ang imong pagkamakasasala ug dawata usab ang grasya sa Diyos.
Pasaylo-a pod ang tanang nakasala ug makasala kanimo. Kini nga kapasayloan makahatag og dakung pabor kanimo mismo ug dili lamang sa imong mga gipasaylo.
Kung anaa ka niining tulo ka mga butang, ikaw gayud makatagamtam og kalamboan ug kalampusan sa imong kinabuhi.