USA ka amahan gisikop sa kapulisan sa Siyudad sa Talisay niadtong Huwebes, Mayo 16, human giingong giabusong sekswal ang iyang pito ka mga anak.
Sa pito, tulo niini mga lalake, kinsa nipasangil sa ilang amahan nga nipaduwa kanila sa ilang kinatawo.
Ang upat ka mga anak nga babaye ningpasangil sa amahan nga ninglugos kanila.
Nasikop si Randy (di tinuod nga ngalan) niadtong Huwebes sa hapon human gireklamo sa iyang mga silingan nga nagdala og armas de fuego sa ilang barangay.
Pagresponde sa mga pulis, ilang nakuhaan si Randy og usa ka .38 kalibreng revolver hinungdan nga gisikop.
Sa dihang gidala na siya sa police station, nangabot ang mga anak ni Randy.
Ilang gibutyag ngadto sa mga pulis nga sila gipanglugos sa ilang amahan.
Ang sekswal nga pagpangabuso gihimo ni Randy sa makadaghang mga higayon, matod sa mga anak.
Ang pito ka mga anak ni Randy nga iyang giingong gihilabtan nagpangidaron og 5 anyos hangtod sa kinamagwangan nga 18 anyos.
Ang mga anak sa suspek gilangkuban og upat ka mga babaye ug tulo ka mga lalake.
Matod pa ni Police Major Ardioleto Cabagnot, Talisay Police deputy station chief, nga gawas sa paglugos sa iyang mga anak nga babaye, giamong-amongan sab ni Randy ang iyang mga anak nga lalake pinaagi sa pagpaduwa sa ilang kinatawo.
Pero gihimakak kini ni Randy sa dihang gikuhaan siyag habig sa mga tigbalita.
Matod pa ni Randy nga ang mga alegasyon nga gibato sa iyang mga anak kaniya bunga lang sa ilang kalagot tungod sige niyang kasab-an sila kon magsinipat.
Bisag gihimakak ni Randy ang pasangil, padayunon gihapon sa kapulisan ang ilang plano pagpasaka og kasong incestuous rape ug acts of lasciviousness batok kaniya.
Kasamtangan nagtingkagol sa Talisay City police stockades si Randy samtang naghuwat nga pasakaan siyag kaso sa kapulisan.