NIADTONG milabay nga Lunes gipahigayon ang nasudnong ug local nga piniliay. May midawat og suborno. May wala midawat og suborno. May nag-ampo, adunay wala magpakitabang sa Dios. May napilian. May wala mapilian. May nalipay. May wala malipay. May mihangad sa ulo, may miduko. May midawat sa resulta. May wala midawat. Mao gyod ni ang natad sa politika. Lainlain og hunahuna. Daling magkawatakwatak ug magkandaiya. Paglaom nga dili pa hingpit.
Dili lalim ang pagdagan. Kulang sa tulog. Dako ang gastohunon. Kinahanglan og mga motambayayong, mga boluntaryo.
Sa akong ubos nga bahin, kon aninawon nato ang tinubdang rason sa mga mipili sa mga napilian nga naglingkod na sa poder, sa ilang pagtimbangtimbang, mas maayo ang kahimtang karon sa nasod kaysa kaniadtong tulo ka tuig nga milabay. Mas nahatagan silag paglaom. Sa laing bahin, kadtong mipili sa wala maglingkod sa poder, wala malipay sa milabay nga tulo ka tuig. Mihandom sila og mas maayong dagan sa nasod o sa ilang lugar pinaagi sa pagpili og bag-ong mga panagway. Niining paagiha nahatagan pod sila og paglaom.
Paglaom ang gihisgotan ni Jesucristo sa dihang nanamilit siya sa iyang mga disipulo: “Karon ang himaya sa Anak sa Tawo gipadayag, ug ang himaya sa Dios gipadayag pinaagi kaniya...” Gilaoman nila nga ibalik ni Jesus ang kalibotanong himaya sa gingharian ni Hari David apan lain ang gipasabot ni Jesus. Iyang kamatayon ug pagkabanhaw nga mopahigayon sa himaya sa Dios.
Dili lamang kini. “Mangita kamo kanako, apan sultihan ko kamo karon sa akong gisulti sa mga Judio, ‘Dili kamo makaadto sa akong adtoan’”. Dili pa nila matagamtaman ang hingpit nga himaya nga matagamtaman na ni Jesus. Apan wala kini magpasabot nga wala silay labot sa maong himaya. Mipadayon si Jesus: “Maghatag ako kaninyog bag-ong sugo: paghigugmaay kamo. Ingon nga ako nahigugma kaninyo, paghigugmaay usab kamo”. Ang gugma nga gipakita ni Cristo, gugma nga maantigong mosakripisyo. Mao kini ang makapaambit ug makapasanay sa himaya ni Jesucristo!
Kining pagsakripisyo giagian sa mga bag-ong sumusunod ni Jesus, ang mga pagano nga gisangyawan ni Pablo ug Bernabe. Miingon ang duha: “Kinahanglan moagi kita sa daghang mga kalisdanan aron makasulod sa gingharian sa Dios”. Nahitabo gyod ni. Walay hunong ang pagpanglutos sa mga Kristohanon.
Apan kining kalisdanan ug sakripisyo magmabungahon. Diha sa libro sa Ang Gipadayag, nakita ni San Juan “ang bag-ong langit ug bag-ong yuta, kay nahanaw na mang ang unang langit ug ang unang yuta ingon man ang dagat”. Simbolo sa kalandrakas ang dagat. Gikan ug gasa sa Dios ang bag-ong langit ug yuta: “Nakita ko usab nga mikunsad gikan sa langit ang Balaang Siyudad, ang bag-ong Jerusalan nga gikan sa Dios, nga sama sa kaslonong babaye nga andam na sa pagsugat sa iyang pamanhonon”.