Mongaya: NAPC angayang suportahan

BISAN mismo si Presidente Rodrigo Roa Duterte miangkon sa kamatuoran nga tipik sa piliay sa Pilipinas kining pagpamalit og boto. Ug kini naghitak tungod sa kawad-on dinhi sa Pilipinas.

Suginlan tika sa usa ka lalis nga akong napaminaw atol sa usa ka party. Usa ka kanhi political operator niingon nga alang kaniya, ang mga kabus mao ang swing vote panahon sa piliay.

Usa ka kanhi aktibista nilalis kaniya nga ang undecided kun ang wala pa makadesisyon mao ang swing vote. Pareho mi nga nabansay sa panglantaw nga ang middle class mao ang ilogan sa lain-laing mga pwersa aron modaog ang pakigbisog sa mga kabus.

Niisplikar ang kanhi political operator. Inig ultima ora, ang mga marukoy nga mga political operator motumbok kinsa ang dali mapabali.

Mahimong di na lang pabotaron. Mahimong pabalihon gyud. Ug si kinsa man kini sila nga mahimong mausab ang baruganan pinaagi sa kwarta? Di ba mao kini ang mga kabus?

Daghan ang moingon kanako nga di angayang insultohon ang mga kabus nga daling mobali kay ibaligya ang ilang boto. Di baya kabus lang ang modawat og kwarta.Apan, naandan na man gyud nga mas epektibo pabalihon ang mga kabus panahon sa piliay. Mas naandan pa gani ang mag-atang sa mo-distribute og kwarta.

Dayon, matinud-anon kini sila. Kay bisan og kining pagbaligyag boto paagi nga mahimong peke ang resulta sa piliay, lisud kumbinsihon kini sila nga sundon ang konsyensya inig botar kay nidawat baya sila sa kwarta.

Mao nga, alang kanako, usa ka lakang aron masumpo ang vote-buying mao ang pagsulbad sa kawad-on ug kakabus.

NAPC

Mao nga nakaingon ko sa akong kaugalingon nga angayang tabangan nga molampos ang National Anti-Poverty Commission (NAPC) sa tahas niini nga wagtangon ang kawad-on dinhi sa atong nasud.

Mao nga nikuyog ko ngadto sa Bohol aron maminaw kang Secretary Noel Felongco ug Usec Pat Ruiz sa gitakdang press conference atol sa usa ka civil society consultation conference didto sa Tagbilaran, Bohol.

Atong nasayran nga tipik sa 5-year strategic framework development plan sa NAPC mao ang pagbuhi sa mga partnership tali sa nasudnong kagamhanan ug ang 14 ka batakang sector sa katawhan.

Tipik sa programa nga gi-implement karon ni Sec. Felongco mao ang people’s participation pinaagi sa mga consultative bodies sa mga lalawigan ug ang NAPC volunteer program sa mga barangay.

Sa pagkakaron, atong nasayran nga aktibong motabang sa NAPC labi sa Ka-Sambayanan program niini mao ang pro-Duterte grassroots movement nga ang Kilusang Pagbabago (KP) Visayas.

Tinuod, lisod kining gitinguha sa NAPC uban sa Kilusang Pagbabago. Bisan pa man, atong nakita nga madasigon sila.

(@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph