GIPAPAS sa Tungkil ang 20 puntos nga labaw sa Lipata-Linao sa first half ug gikulit ang 87-84 nga kadaugan sa nagpadayon nga 2019 Minglanilla Mayor’s Cup Summer League basketball event Bracket B Open division nga gipahigayon sa Minglanilla Sports Complex niadtong Biyernes sa gabii.
Ubos sa pagpangulo ni Ramel Guevara ug Joegar Restauro, ang Tungkil nagsugod sa pagtibhang sa labaw sa Lipata-Linao sa third quarter ug komportabli kang misakiyo sa liderato sa tungatungang bahin sa fourth quarter.
Hinuon, sa katapusang tres minutos nakabaton og pagpanghudlat ang mga batos ni coach Rick Jocson human nakalusad ang Lipata-Linao sa ilang katapusang rally sa dihang nagkumboya sila si James Fuentes ug Jaypher Ocanada.
Apan ang ilang pagkasipyat sa mga oportunidad sa himatyong mga segundos maoy nagwahing sa agianan sa Tungkil paingon sa ilang ikatulong daog sulod sa upat ka duwa.
Si Guevarra mihagpat og 28 puntos samtang si Restauro mitali usab og 19. Sa habig sa Lipata, si Fuentes mitapos sa duwa nga may 27 puntos ug 25 usab ang nahimo ni Ocanada.
Ang kapildihan maoy unang naangkon sa Lipata human sa tulo ka sunodsunod nga daog.
Sa 17-under category (Bracket C), yanong gipukan sa Calajoan ang Cadulawan, 74-53.
Si Wilfred Caparas ug Kenneth Naingue nagkumboya og 22 puntos alang sa Calajoan (2-2).
Ang Cadulawan nahagsa ngadto sa 0-4 nga baraha. Girehistro usab sa Pakigne ang ilang ikalimang daog sa 21-under category.
Kini human nila dominaha ang Cadulawan (3-2), 93-84. Si Justine Nebril, kanhi sakop sa University of Cebu (UC) Baby Webmasters, mipuga og 29 puntos nga gidugangan usab og 12 puntos sa iyang ig-agaw nga si John Carl Nebril alang sa Pakigne.
Nangulo sa Cadulawan si Michael Cabanes nga mipaulbo og 33 puntos. (JBM)