PIPILA ka mga tuig na ang nakalabay, ako ug ang akong manghod nanubay sa mga agianan nga iya nang nabisita, apan ako wala pa bisan makausa. Sa among pagtindak, nasum-ok mi sa landfill sa lungsod sa Consolacion.
Natural, wa may basura nga humot. Wa koy nahimo kay kon di ko moginhawa, basin atakihon ko sa kasingkasing sa kakutas. Nakasaad ko sa akong kaugalingon nga di na ko mobalik pagtaak sa lugar. Kon di ka maanad og hanggap, lisod kaayo iginhawa.
Niadtong miaging gabii, dihang naabtan mi og bunok sa uwan, ningpasilong mi sa usa ka banko kay nibundak man ang uwan. Ang akong misis nagsige og bagulbol kay ang mga trak sa basura sa Dakbayan sa Mandaue nagsunod sa pag-agi. Mangalisbo ang baho.
Mao ni karon ang problema sa mga lumolupyo sa Talamban lahos na sa Bacayan, Pit-os, Binaliw ug uban pang mga dapit. Sukad gisugdan na ang paglabay sa mga basura sa usa ka landfill sa Barangay Binaliw, manimaho na ang karsada.
Mosamot nang di na ko ganahan mosaka agi sa Barangay Mabini kay maagian ang Binaliw diin nahimutang ang landfill. Nakaamgo ba kaha ang mga opisyal sa Dakbayan sa Sugbo nga sa mga agianan sa mga trak sa basura ug mismo ang dapit, residential area.
Hinaut pang makahimo og lakang puhon si Mayor-elect Edgar Labella.
EPIC
Masuwayan na ang mga tuhod ug baga sa akong mga higala nga nangapil sa Cebu Epic karong Hunyo 9. Maanindot ang rota kon mag-sight seeing ka lang. Apan kon mag-mountain bike ka, gawas nga kutas, masuwayan ang imong skill sa mga agianan nga medyo technical, tungason pa gyud.
Samtang sa Enduro nga lumba masuwayan ang technical skill ug maneuvering expertise sa biseklita, sa Epic anha makita ang endurance sa usa ka rider. Dunay riders nga di na mangambisyon nga madala sa taas nga ranking pinaagi sa pagpamubo og maayo sa oras. Daghan ang gusto lang nga ma-finisher.
Ang labing taas nako nga rota sa MTB sa bukid 75 kilometros ra, tungas ug dulhog naa sa 60 kilometro kapin. The rest puro na patag. Unsa na kaha ning sa Cebu Epic nga 80, kilometro, sagad climb ug technical pa?
Bitaw, di usab ni mangapil ang naa sa lumba kon di sila andam. Ako ganing mga higala nag secret training.
SUPORTA
Buhi kaayo ang biking community sa Cebu itandi sa ubang mga dapit sa Kabisay-an. Imo ning makita sa weekends ug holidays. Manggawas ang daghang mga biseklita. Apan ang nakapait palandungon, kuwang kaayo og suporta sa kagamhanan.
Hinaut pa unta nga ubos sa bag-ong administrasyon sa City Hall, hatagan og atensyon kining among sektor.