SA PAGPAHIGAYON sa Brigada Eskwela sa Department of Education sa sunod semana, mobalik usab ang Cebu Provincial Anti-Drug Abuse Office (Cpadao) sa pagpaubos sa drug test sa mga magtutudlo sa mga publikong tunghaan.
Si Carmen Remedios Durano-Meca, pangu sa Cpadao, nibutyag nga apil sa drug test ang non-teaching staff sa mga publikong eskwelahan.
Tungod kay kinalit ang drug test, wa nganli ni Meca kon unsa ang mga tunghaan nga gi-target sa sunod semana, apan nakahan-ay na ang eskedyul niini sa pakiglambigit ni Dr. Rhea Mar Angtud, ang provincial schools division superintendent.
Sa pagkakaron, nag-consolidate sila sa data sa gidaghanon sa mga magtutudlo ug non-teaching staff nga napaubos na sa drug test sa Cpadao uban sa Philippine Drug Enforcement Agency (PDEA) 7.
Gawas sa mga magtutudlo, prayoridad usab nila sa pakigtambayayong sa PDEA 7, ang pagpaubos sa kinalit nga drug test sa sektor sa transportasyon nga naglangkob sa mga drayber, konduktor ug ubang trabahante sa mga publikong sakyanan.
Ang Cpadao ang naghatag sa testing kits ug serbisyo nga gikinahanglan sa PDEA 7 alang sa drug test.
Nakigtambayayong usab sila si Meca sa Bureau of Jail Management and Penology sa Central Visayas aron ma-drug test ang mga warden, jail officers ug ubang mga kawani sa ahensiya.
Niadtong Abril, 53 ka jail wardens ang gipakalitan og drug test sa Cpadao ug PDEA 7 sa rehiyonal nga buhatan sa BJMP 7. Sila pulos nagnegatibo sa paggamit og gidili nga drugas. (SCG)