SI KONGRESISTA Gwendolyn “Gwen” Garcia sa tersero distrito sa Sugbo mobalik sa Kapitolyo karong Hunyo 30 human sa unom ka tuig. Giproklamar siyang mananaog sa pagkagobernador sa alas 11:30 sa buntag niadtong Huwebes, Mayo 16.
Nakakuha si Garcia og 887,290 ka mga botos ug midaog batok kang Bise Gobernador Agnes Magpale nga nakakuha og 598,567 ka mga botos. Apan ang running mate ni Magpale, si Gobernador Hilario Davide III, nidaog sa pagka bise gobernador.
Si Davide duna pay nahibilin nga termino apan wa makigsangka kang Garcia. Nakakuha siya og 781,312 ka mga botos batok sa iyang kaatbang nga si Daphne Salimbangon nga may 618,828 ka votes.
***
Si Garcia gipahamtangan og unom ka buwan nga suspensyon ni kanhi Presidente Benigno “Noynoy” Aquino III niadtong Disyembre 2012. Hilom siyanga nanaog sa Kapitolyo ug nisayaw sa Sinulog. Natapos ang iyang termino pagkagobernador niadtong Hunyo 2013.
Namahayag si Garcia nga ang gahom nga gilangkat gikan kaniya pinaagi sa suspension nga iyang gihulagway nga illegal nakuha niyag balik gumikan sa gahom sa mga balota sa mga botante nga nipili kaniya.
Unsay mahitabo sa iyang pagbalik sa Kapitolyo? Ang una niyang mensahe mao nga wa siya makalimot sa mga nagbudhi kaniya, sa mga nitalikod kaniya sa dihang gisuspenso siya ug sa pagkatapos sa iyang termino.
***
Matod pa ni Garcia,“Ever since my term ended as governor of Cebu in June 2013, during those six years, I have seen those that have betrayed me and those that have stayed loyal to me at their expense.”
Kon was siya makalimot sa mga mabudhion, wa sab siya makalimot niadtong nagpabiling loyal ug niunong kaniya. Mao nga ipahigayon niya ang usa ka performance review sa tanang mga kawani sa Kapitolyo mga mopakin sa 4,000.
Sa maong gidaghanon, 1,118 mga permanent or regular employees, samtang 1,905 ang job order (JO) workers. Adunay 636 ka mga casual employees ug 362 ka mga contract of service workers nga mga doktpor ug medical specialists. Mopasar kaha sila sa loyalty test?