ANG BRIGADA Eskwela maoy usa sa labing malampusong programa sa Department of Education (DepEd) nga naglambigit sa tanang stakeholders, lakip sa sektor sa magpapatigayon, ang sadya nga pag-andam sa mga publikong tunghaan alang sa ting-eskwela. Nahimo na kining tinuig nga kalihokan.
Ug karong adlawa, Lunes, Mayo 20, ang Brigada Eskwela dungan nga pagsugdan sa tibuok nasod nga pangulohan sa atong mga bayaning magtutudlo, kinsa bag-o pa sa ilang pagserbisyo sa piniliay sa miaging Lunes, Mayo 13. Bisan sa ilang nahago, andam gihapon silang manguna sa Brigada Eskwela.
Si Dr. Rhea Mar Angtud, provincial schools division superintendent, nahinabi sa Superbalita Cebu sa miaging semana, nipadayag nga dili bastabasta ang ilang serbisyo sa eleksiyon hangtod nga na-transmit ang election returns.
Niadtong Sabado, Mayo 18, gilusad sa DepEd 7 ang Brigada Eskwela sa Carnaza Elementary School (CES) sa gamay nga isla sa lungsod sa Daanbantayan, amihanang Sugbo. Matod ni Angtud, gipili ang CES tungod kay nanginahanglan kini og tabang nga tumong sa Brigada Eskwela ug nag-awhag sa mga ginikanan ug ubang stakeholders nga moapil sa Brigada Eskwela nga magsugod karong, Mayo 20.
Dugang ni Angtud nga tumong sa usa ka semana nga pagpanglimpyo nga maandam ang mga tunghaan sa pagbukas sa klase karong Hunyo 3, Lunes.
Gibutyag ni Angtud nga moabot sa 700,000 ka mga tinu-an sa tanang ang-ang sa mga publikong tunghaan ubos sa iyang division, 400,000 niini sa elementarya. Sa pagbukas sa school year 2019-2020, ilang nalantawan nga motubo og 2 ngadto sa 5 porsyento ang enrollment sa mga publikong tunghaan.
Ang Brigada Eskwela takos ug angay sa atong pagsuporta sa bisan sa unsang bahin ug kapasidad aron mas hamugaway ug haom sa pagtuon ang mga tunghaan atol sa pag-abli sa klase.