ERNESTO D. LARIOSA
San Fernando, Cebu
HUMAN sa unom ka mga buwan sa iyang ‘residency’ sa bantugang ospital sa kaulohan nagdali nga mipauli si Dr. Manuel Almagro. Kini tungod sa tawag sa iyang hinigugma nga si Mirasol nga nagpahibawo nga kaslunon siya nianang sunod Dominggo.
Sa ilang tagbuanan sa Guanzon Beach Resort. Hilom nga salabtunon kaayo ang ilang mga tinan-awan samtang way kisaw ang dagat. Nagtinutokay silag dugay. Naghuwat kinsa ang unang mobuak sa kahilom. Kalit mibakho si Mirasol.
“Pasayloa, ko Maning, wa ko kini tuyoa. Wa ko mahigugma niya.” “Apan, nganong siya man ang imong pakaslan, giampingan ko ang atong gugma, Mira.” Migahi ang tingog ni Manuel.
Misaysay si Dr. Mirasol Lira sa hinungdan. Mitambong siya sa birthday party sa usa nila ka kauban. May gibutang nga sleeping tablet sa iyang coke. Nakatulog siya. Pagmata niya diha na siya sa lawak gipahimuslan na ang iyang pagka babaye ni Dr. Ruben Durano. “Rapist, siya!”
Nagkagot ang ngipon ni Maning. May adlaw ra si Ruben kaniya. Giumod sa doktora ang iyang nawong sa dughan ni Maning nga hugot nga migakos kaniya. “Okey, Mira, nakasabot ko!” Miluha ang mga mata ni Maning. Misamot ang pagbakho ni Mira.
Mao na lay lingaw ni Maning kada buntag nga maminaw sa awit sa tamsi nga magbatog duol sa iyang bentana. Bulok dalag ang dughan sa langgam. Inighuman maglukso-lukso sa mga sanga sa Kaymito daw tugob sa kalipay dayong lupad palayo. Pinaagi sa awit sa tamsi mahinumdom siya sa iyang kabatan-on sa banika. Nahinumdom siya sa iyang pagpanirador uban nilang Boy, Rudy, Berto, Muloy ug Dencio. Nawa siya sa banika dihang nakapasar siyag scholarship sa Manila nga nigasto niya gikan sa high school hangtod sa kurso nga medisina. Dihang nagkauyab silang Mirasol iya kining gida sa ilaha sa banika. Nakita niyang mahigugmaon sad kini sa kinaiyahan ug sa awit sa kalanggaman.
Usa ka buntag huros sa hangin ang mipukaw niya, di na ang awit sa tamsi. Mibangon siya ug milantaw sa gawas sa iyang mountain resort nga bag-o pang nahuman.
Kalit mitingog ang iyang selpon. “Yes, si Dr. Maning Almagro kini, moanha ko dayon. Dali siyang nakaligo ug nakailis. Misirit dayon ang iyang awtong Cadilac Nganong gipusil si Mirasol sa iyang bana? Nagpusil sad kuno ang bana sa kaugalingon ug namatay samtang si Mirasol buhi apan kinahanglang operahan.
Usa ka oras gyud ang iyang dagan. Milahos dayon siya sa operating room. Naabtan niya ang higala niyang doktor nga maoy nag-atiman kang Mirasol.
“ Okey na, Maning, miundang na ang dugo sa ilawom. Ikaw ang labing batid nga neurological surgeon sa Sugbo. Luwasa siya, Maning. I’ll assist.”
Wa motingog si Maning, nia ang babaye sa iyang dughan nga di niya makalimtan bisan sa katuigang nanglabay. Nanguros siya. “Give me, the scalpel, Dr. Rias.” Gitunol sa iyang higala. Gidawat. Gidisdisan niya ang nagkadugong ulo ni Mirasol. Paglabay sa usa ka oras nakuha ang bala nga nakaduot og gamay sa utok. Miginhawag halawom si Maning ug mipadayon sa makuting operasyon. Takdo lima ka oras milampos ang operasyon.
Milabay ang unom na ka mga buwan. Sayo sa buntag kalit siya mitimbakuwas sa higdaanan dihang tin-aw niyang nadungog ang awit sa tamsi. Sa sanga sa Kaymito nag-awit kini atubang kaniya. Sa luyo ang laing tamsi nga miduyog sa iyang awit. Mipahiyom si Maning nga nakasabot. Nahibalik na ang gikamingawan niyang tamsi nga may kauban na, daw nagpagarbo kaniya. Wa motang-on ang iyang pahiyom kay nakahinumdom kang Dr. Mirasol Lira nga moduaw niya ning adlawa uban sa anak niini nga maoy hinungdan sa dakong away sa magtiayon, kay wa na makapugong ang doktora nga mitug-an sa iyang bana sa kamatuoran nga siya (Maning) diay ang amahan sa bata. (KATAPUSAN)