NAGPAKATAP og 36 puntos si Stephen Curry apan mas mikawat og dakong atensyon si Draymond Green sa iyang pagmugna og triple-double sa kadaugan sa defending champion Golden State Warriors batok sa host Portland Trail Blazers, 110-99, kagahapon sa Game 3 sa National Basketball Association (NBA) Western Conference finals.
Ang Warriors, nga nagtinguha sa ikatulo nilang sunodsunod nga NBA title, nakaposte na og dominanteng 3-0 nga bintaha sa best-of-seven series.
Sa kasaysayan sa NBA, wala pa’y sukad nga nakabangon gikan sa 0-3 nga biya aron dag-on ang usa ka best-of-seven series.
Ning sangkaa, si Green maoy nakahatag og grabeng labad sa ulo sa Trail Blazers. Gawas sa iyang pilit nga depensa, si Green nakahimo pa og 20 puntos, 13 rebounds ug 12 assists.
Alang kang Warriors coach Steve Kerr, usa kini sa labing maayong duwa ni Green nga iyang nasaksihan.
“I don’t even know what to say about Draymond,” matod ni Kerr. “He was a wrecking ball, destroying everything in his path.”
Nahimo kining tanan sa Warriors bisan wala gihapon nakaduwa ang usa sa ilang labing mga sinaligan nga si Kevin Durant, kinsa padayon pang nagpaalim sa iyang angol sa tiil.
“When Kevin is not on the floor, I know I have to be more aggressive. So whether that’s attacking the basket, putting more pressure on the defense, I understand that,” asoy ni Green.
Ang Blazers gipangulohan ni CJ McColllum pinaagi sa iyang 23 puntos samtang nidugang og 19 puntos si Damian Lillard.
Tatawng nadasig sa ilang mga sumosunod, ang Trail Blazers nakamugna og 18 puntos sa 2nd quarter.
Apan sama sa nahitabo sa Game 2, gipasutoy sa Warriors ang ilang opensa sa 3rd quarter hangtod nga naangkon nila ang labaw, 77-76, sa labing unang higayon sa nahabiling 1:54 minutos sa quarter.
Padayon ang pagratsada sa Warriors hangtod nga ilang nainat ang ilang labaw ngadto sa 11 puntos, 98-87, pinaagi sa three-point shot ni Curry sa nahabiling 4:51 minutos. (AP, ESL)