MAYORIYA sa nakadaog ug naproklamar nga mga mayor sa lalawigan sa Sugbo sa miaging Mayo 13 nga piniliay kay mga kapartido ug kaalyado sa pulitika ni governor-elect ug outgoing Cong. Gwendolyn Garcia.
Bisan kon nipasidaan si Garcia nga dili siya makalimot sa mga tawo nga nitraydor niya, apan naila usab ang opisyal nga mopatagamtam usab og mga proyekto ug programa sa mga lungsod ug siyudad bisan kon wa mosuporta niya ang mga nagdumala niini.
Sa 51 ka mga mayor sa lalawigan nga nakadaog, 14 niini mga kapartido ni Garcia sa One Cebu/Partido Demokratiko Pilipino-Lakas ng Bayan (PDP)-Laban samtang ang 19 kay mga kaalyado sa pulitika: pito sa Nacionalista Party (NP) ug lima sa National Unity Party (NUP).
Sila pulos nipaluyo sa kandidatura ni Garcia ug sa running mate niini nga si Daphne Salimbangon.
Samtang, ang 23 nga nidaog pagka mayor nikampanya pabor kang outgoing Vice Governor Agnes Magpale: 14 niini mga miyembro sa Nationalist People’s Coalition (NPC) ug siyam sa Barug Alang sa Kauswagan ug Demokrasya (Bakud) party.
Ang numero posible pa mausab sa pagsugod sa bag-ong administrasyon sa Kapitolyo sa Hunyo 30.
Si Badian Mayor Carmencita Lumain nga nisang-at unta sa iyang certificate of nomination and acceptance (Cona) gikan sa NPC sa Commission on Elections, dungan sa iyang certificate of candidacy niadtong Oktubre 2018, kalit nibali sa iyang suporta sa One Cebu pipila ka adlaw sa wala pa ang piniliay.
Samtang si incoming Toledo City Mayor Marjorie Perales, nidaog isip independente nga kandidato.
Ang nakadaog nga mga mayor nga mga kapartido ug kaalyado sa pulitika ni Garcia mao sila si:
Sa unang distrito, pulos mga sakop sa NP ang nakadaog nga naglangkob nila ni incoming mayors Gerard Anthony Gullas Jr. sa Talisay, kasamtangan nga kongresista sa distrito; Valdemar Chiong sa City of Naga; Mercedita Apura sa siyudad sa Carcar; ug Lionel Bacaltos sa Sibonga. Samtang reelected sila si Minglanilla Mayor Elanito Peña ug San Fernando Mayor Lakambini Reluya.
Sa ikaduhang distrito, duha lang ang One Cebu/PDP-Laban ug incoming mayors Allan Sesaldo sa Argao ug Jeffrey Belciña sa Dalaguete.
Samtang lima ang sa NPC, sila si reelected Oslob Mayor Jose Tumulak Jr., Samboan Mayor Emerito Calderon, Boljoon Mayor Merlou Derama ug Alcoy Mayor Michael Angelo Sestoso. Si incoming Santander Mayor Marites Buscato ang ikalima.
Sa ikatulong distrito, mayoriya sa mga mayor kay One Cebu/PDP-Laban nga naglakip nila ni reelected Pinamungajan Mayor Glenn Baricuatro, Asturias Mayor Jose Antonio Pintor, Aloguinsan Mayor Cesare Ignatius Moreno, ug Barili Mayor Marlon Garcia, manghod ni Gwen. Madugang si incoming Balamban Mayor Alex Binghay, kasamtangan nga provincial board member.
Si Tuburan Mayor Danilo Diamante ang bugtong NPC sa distrito. Si Perales, independente nga kandidato, apan tigpaluyo ni outgoing Toledo City Mayor John Henry Osmeña sa Team Alagad, kinsa nipaluyo sa mga kandidatura nila ni Magpale ug umaabot bise gobernador ug incumbent Governor Hilario Davide III.
Sa ikaupat nga distrito, lima ang NUP nga naglakip nila ni reelected mayors Raul Gerona sa Tabuelan, Zigfred Duterte sa Tabogon ug Joven Mondigo Jr. sa Medellin ingon man incoming mayors Sun Shimura sa Daabantayan ug Ithamar Espinosa sa Santa Fe. Si incoming Madridejos Mayor Salvador Dela Fuente sa NP, kaalyado usab sa One Cebu/PDP-Laban.
Sa NPC, sila si reelected Bogo City Mayor Carlo Martinez ug San Remigio Mariano Martinez ingon man umaabot Bantayan Mayor Arthur Despi.
Sa ikalimang distrito nidominar ang mga miyembro sa Bakud party nga naglakip ni reelected Mayor Ramon “Nito” Durano III, incoming mayors Greman Solante sa Tudela, Froilan Quiño sa Compostela, Richard Streegan sa Sogod, Edgar Rama sa Poro, Carlo Villamor sa Carmen, Manuel Santiago sa Pilar, Iris Baylon-Gestopa sa Catmon ug Al Arquillano sa San Francisco.
Sila si reelected Liloan Mayor Christina Frasco ug Noel Dotillos lang ang mga miyembro sa PDP-Laban.
Sa ikaunom nga distrito nidominar ang One Cebu/PDP-Laban human na-reelected si Cordova Mayor Mary Therese Sitoy-Cho ug nidaog sila si incoming mayors Jonas Cortes sa siyudad sa Mandaue ug Joannes Alegado sa Consolacion.
Sa ikapitong distrito, dominante ang NPC nga may lima ka mga mayor ang nakadaog. Sila mao si reelected mayors Dean Michael Singco sa Ginatilan, Efren Guntrano Gica sa Dumanjug ug Verna Magallon sa Alegria uban sila si incoming mayors Rozgoni Paz sa Moalboal ug Terence Blanco sa Ronda.
Sa 28 ka incumbent mayors nga nagpapili og balik sa pwesto, 24 lang ang nasublian samtang upat ang napildi. Kini sila si Argao Mayor Stanley Caminero, Santa Fe Mayor Jose Esgana, Alcantara Mayor Beatriz Caburnay ug Mandaue City Mayor Gabriel Luis Quisumbing.
Ang laing mga mayor nga nagpapili og laing pwesto apan napildi mao sila si Dalaguete Mayor Ronald Allan Cesante pagka kongresista sa ikaduhang distrito ug Toledo City Mayor John Henry Osmeña sa pagka kongresista sa ikatulong distrito.
Ang ubang incumbent mayors nga nagpapili og laing pwesto ug nakadaug mao sila si Talisay City Mayor Eduardo Gullas sa pagka kongresista sa unang distrito; pagka bise mayor sila si City of Naga Mayor Kristine Chiong, Carcar City Mayor Nicepuro Apura, Santander Mayor Marilyn Wenceslao, Tuburan Mayor Democrito Diamante, Tabuelan Mayor Rex Gerona, Madridejos Mayor Jay River Dela Fuente, Tudela Mayor Erwin Yu, Sogod Mayor Lissa Marie Durano-Streegan, Poro Mayor Luciano Rama, San Francisco Mayor Aly Arquillano, Moalboal Mayor Inocentes Cabaron, ug Ronda Mayor Rocky Gabatan; sa pagka konsehal sila si Sibonga Mayor Caroline Bacaltos ug Carmen Mayor Martin Gerard Villamor.
Samtang wala modagan sila Balamban Mayor Ace Stefan Binghay, Daanbantayan Mayor Vicente Loot, Bantayan Mayor Ian Christopher Escario ug Compostela Mayor Joel Quiño, kinsa nipa-substitute sa iyang pag-umangkon nga si Froilan Quiño. (SCG)