COTABATO CITY -- Andam nga suportahan ni outgoing Maguindanao Governor Esmael ”Toto” Mangudadatu ang bag-ong naproklamar nga gobernador sa probinsiya.
Emosyunal nga miatubang sa mga sakop sa media si Mangudadatu human siya naproklamar nga kongresista sa ikaduhang distrito sa Maguindanao.
Nalipay si Mangudadatu sa iyang kadaugan apan nasubo sab siya ka kapildihan sa iyang manghud nga si Freddie Mangudadatu nga midagan pagka-gobernador.
Hinoon matud niya, andam siya nga suportahan ang tanan nga agenda ni Bai Mariam Sangki Mangudadatu isip bag-ong gobernador sa probinsiya kun alang kini sa kaayuhan sa katawhan.
Andam sab nga makighinabi si Mangudadatu sa pamilya ni Sultan Kudarat Governor Elect Suharto “Teng” Mangudadatu nga mister ni Bai Mariam aron resulbahon ang bikil sa ilang pamilya ilabina sa politika.
Gikanayon ni Mangudadatu nga ang eleksiyon moagi lamang og angayan nga kalimtan ang away sa politika lakip na ang pagtakdo sa maayong relasyon sa matag usa ilabina sa pamilya.
Nagpasalamat ang gobernador sa katawhan sa Maguindanao nga misuporta sa iyang kandidatura, sa pagsalig kaniya sa tulo ka termino ug pagdaog niini isip kongresista sa ikaduhang distrito sa Maguindanao.