TALIWALA sa mga kantiyaw ug mga sungog tungod sa kabilinggan sa ilang panglawas, wala kini makapatarog sa ilang gugma hangtod nahiusa sila sa kaminyuon.
Niadtong Mayo 18, 2019, Sabado, duha ka persons with disability (PWD) nanaad atubangan sa altar sa kaminyuon sa San Agustin de Hippo Parish Church, City of Naga nga gitambongan sa ilang tagsatagsa ka pamilya, kabanay ug mga higala.
“I hope maka-inspire mi sa PWDs. Mao ra g’yod na akoa. Gusto nako nga maindependent-with her,” matod ni Godfrey Paquibot, 41.
Mapaubsanong gidawat ang mga kamot ni Godfrey sa iyang gimahal sa kinabuhi nga susama kaniya nga naay kabilinggan sa panglawas nga si Irish Bariquit-Paquibot, 31.
“Naa man gud koy friend nga PWDs nga dili ganahan makig-relationship pod og PWDs. Para lang nako, gusto nako nga pareha sad nako kay naka experience man ko before nga napasakitan ko og “tarong nga babaye,” matod ni Godfrey.
Si Godfrey, taga Lapu-Lapu City, nahimugso nga dunay problema sa spinal column hinungdan nga maglisod sa paglakaw nga wala kauban.
Siya nakahuman sa kursong Bachelor of Science Computer Science sa Indiana Aerospace University ug karon nagtrabaho isip usa ka home care staff sa Lapu-Lapu City.
Samtang si Irish, taga Naga, nahimugso nga buktot. Usa siya ka staff sa Lapu-Lapu local civil registrar.
Ang duha unang nagkita niadtong Abril 2016 atol sa monthly meeting sa usa ka organisasyon sa PWDs sa Lapu-Lapu City, diin parehos ilang aktibo.
“Ako siya nakit-an niya mura’g na-fall ko niya. Kay mura’g naay something man gud niya. Permiro nimong tan-aw sa usa ka tawo, naa bitaw nga gaan imong pagbati niya,” matod ni Godfrey.
Si Godfrey maoy presidente sa Mactan Persons with Disabilities gikan sa 2007 hangtod sa 2016. Tungod sa kanunay nga pagtupo-tupo kanila sa ilang mga higala, naumol ang ilang relasyon nga niluntad og usa ka tuig sa wala pa magminyo.
“Giduol nako siya, ang akong gipaagi’g joke-joke ba. Kay kung seryoso pa ko ato, dili tingali ko kaduol. Mao tong akong gipangayo iyang number ug Facebook (name),” matod ni Godfrey.
Si Irish niingon nga wala siya makatuo nga makatagbo og kapares nga modawat kon kinsa siya ug duna ang dili niya mahimo.
“Wala jud ko nag-expect nga maabot mi ani, nga makasal mi. Kay mura’g wala ra man jud siya. Mao tong nakuan nako nga seryoso na diay siya. Sauna siya ang mura’g mu dili, karon, siya namay murag mu hold-on ba,” matod ni Irish.
Sama sa komon nga managhinigugmaay naay “on-and-off” ang ilang relasyon ug mga hagit nga naagian.
Nahadlok nga kantiyawan, si Irish nidili kang Godfrey sa pag-post og photos nilang duha sa social media.
Si Godfrey niangkon nga naganahan lang siya sa unang higayon ni Irish apan nagkalawom kini sa dagan sa mga adlaw ngadto sa gugma.
“Naa man guy panahon nga kini laging naay laing babaye, naka fling nako. Of course mas advantage man gud ang tarong nga babaye ba unya kanang wala pa man jud ko ingon nga naay gugma sa iyaha at first hangtod naka relate nako niya,” matod ni Godbfrey.
Si Irish, bisan nasakitan nga giluiban, gipili niya nga makigbisog ug makapasaylo aron pasalbar sa relasyon.
“Naka try ko nga dili mu reply i-dedma ba, but kulit man gihapon siya,” matod ni Irish.
Mapasalamaton sila sa suporta sa ilang pamilya ug mga higala sa hukom ug galastuhon sa kaminyuon. Karon nga minyo na sila, si Irish naglaum nga makahimo sila og pamilya sa umaabot ug magpuyo og normal nga kinabuhi. (B)