SA 123 ka mga barangay sa lalawigan sa Sugbo nga ning-apply aron madeklarar nga drug-cleared, 37 lang ang nakapasar alang sa onsite validation sa Philippine Drug Enforcement Agency (PDEA).
Si Carmen Remedios Durano-Meca, pangu sa Cebu Provincial Anti-Drug Abuse Office (Cpadao), nibutyag nga ang nahabilin nga mga barangay wa mo-qualify sa onsite validation base sa parameters nga gitakda sa Dangerous Drugs Board (DDB).
Sa 37 ka mga barangay, sigon ni Meca, tulo niini sa Tabuelan, upat sa Sogod, siyam sa Carmen, tulo sa siyudad sa Danao, unom sa Argao, tag duha sa Santa Fe ug Madridejos ug walo sa Bantayan.
Aron maka-qualify sa onsite validation, kinahanglan ang usa ka barangay kay dunay kasamtangang community-based rehabilitation program (CBRP) alang sa iyang drug surrenderers, kinahanglan 75 porsyento sa drug surrenderers kay na-enroll sa CBRP, ug kinahanglan slightly affected lang ang affectation sa gidiling drugas sa barangay.
“Kinahanglan slightly affected kay kon moderately ka di gyud ka pwede modiretso nga ma-drug-cleared. Kinahanglan ka mo-downgrade sa slightly affected,” pasabot niya.
Sumala ni Meca apil usab sa parameters sa DDB kinahanglan nga way nagpuyo nga drug personality nga naa sa listahan sa PDEA ug Philippine National Police ang maong barangay ug basic hangtod sa high ang range sa functionality sa Anti-Drug Abuse Council (Adac) sa barangay.
Kon kini nga parameters dili mahimo sa barangay, dili mo-qualify sa onsite validation ang barangay, dugang niini.
“That’s the agreement with PDEA and the other line agency nga they will not qualify for onsite validation without those that I’ve mention,” dason ni Meca.
Sa higayon nga makumpleto sa barangay ang parameters nga gitakda sa DDB, isumitir niini ang ilang folder o aplikasyon ngadto sa PDEA 7.
Sa pag-apply sa barangay nga madeklarar nga drug-cleared, kinahanglan moagi kini sa chief of police sa ilang local government unit.
Samtang, gikompirmar ni Meca nga dunay pipila sa 245 ka mga barangay nga unang nadeklarar nga drug-cleared ang nameligrong mahukasan sa deklarasyon human sa revalidation sa PDEA 7.
Dili pa makasulti si Meca kon pila kini nga mga barangay sanglit nagpadayon ang revalidation nga gipaabot mahuman sa Hunyo 13.
Base sa mandato sa DDB, matag tulo ka buwan i-revalidate ang mga barangay nga nadeklarar na nga drug-cleared pagtino kon padayon kini nakatuman sa parameters nga gitakda aron maangkon ang maong deklarasyon.
Hangtod sa Biyernes, 18 na lang gikan sa 245 ka mga barangay nga nadeklarar na nga drug-clear ang revalidate. Ang lalawigan sa Sugbo dunay 1,066 ka barangay. (SCG)