ANG brown shabu mibalik sa merkado?
Nasikop ang giingong high value target sa City Intelligence Branch (CIB) sa Cebu City Police Office (CCPO) sa Sitio Lahing-lahing II, Barangay Mabolo, Dakbayan sa Sugbo Dominggo sa hapon, Mayo 19.
Giila ang suspek nga si Marvin “Ogis” Saberon, 32, nga nakuhaan og dul-an P3 milyones nga kantidad sa gidudahang shabu nga puti ug brawnon ang kolor.
Sumala ni Police Lt. Col. Carlito Apilat, hepe sa CIB, mitug-an ang suspek nga ang brawnon nga shabu dili tanlas sa tutunlan sa gumagamitay kumpara sa puti.
Midugang si Apilat nga ang brawnon nga shabu lain nga matang sa shabu ug ang nangasakmit nga mga ebedensiya sutaon sa chemist.
Ang brawnon nga shabu, matod ni Apilat, susama lang og kantidad sa puti nga klase.
Si Saberon nadakpan atol sa gipahigayong drug bust. Nakuhaan siya og napu ka dagkong pakete sa brawnon nga shabu, pito ka dagkong pakete sa puti nga shabu ug usa ka medium nga pakete.
“Nakadawat kami og mga taho sa iyang ilegal nga mga kalihokan sa droga mga usa ka semana sa wala pa kini nga operasyon,” matud ni Apilat sa Iningles.
Si Apilat nagkanayon nga ilang tan-awon ang mga koneksiyon ni Saberon bisan pa man og bag-ong pang naila nga tigpayuhot og shabu ang suspek. Sutaon sa taga CIB kon aduna bay laing pushers nga nagtrabaho ubos sa suspek.
Ang nangasakmit nga kontrabando mitimbang og 430 ka gramo ug gibanabana kini nga mokantidad P2,924,000.
Sa laing operasyon, ang City Drug Enforcement Unit sa CCPO miaresto kang Redwin “Jumong” Tito, 35, sa Villagonzalo II, Barangay Tejero sa samang adlaw.
Nakuha atol sa buy-bust ang 25 gramos nga shabu nga nagkantidad og P170,000. (Gihubad ni KAL)