Gatosan partisipante sa youth convention naospital

MGA 233 ka mga partisipante sa 8th National Youth Convention ang gidala sa balay tambalanan sa Bukidnon human nakasinati og pagsakit sa tiyan ug pagsuka niadtong Huwebes, Mayo 16.

Nagpahigayon na og imbestigasiyon ang Department of Health (DOH)-Northern Mindanao sa maong insidente.

Nagagikan ang maong mga batan-on sa nagkadaiyang dapit sa Luzon, Visayas ug Mindanao alang sa maong convention sa Seventh Day Adventist Reform Movement sa Center for Ecological Development and Recreation sa Impalutao, Impasug-ong, probinsya sa Bukidnon.

Sa gipagawas nga pahayag sa DOH-Northern Mindanao giingong atol sa panghitabo kalit nga nakasinati ang mga partisipante og panakit sa ilang tiyan ug diarrhea ug daling gidala sa mga nagkadaiyang ospital aron nga mamonitor.

Gipalawman na ang imbestigasiyon ilabi na sa DOH Center for Health Development-Northern Mindanao kauban ang tinugyanan sa local government unit sa maong dapit.

Giingong dako ang posibilidad nga rason niini nga ang kusina duol sa pansayan ug ang tinubdan sa tubig gikan lamang sa spring.

Sa pagkakaron nagpahigayon na og water sampling aron masuta ang hinungdan sa maong panghitabo.

Nagpahimangno usab ang tinugyanan sa DOH- Northern Mindanao aron nga malikay niining susama nga panghitabo nga angayang bantayan ang mga insaktong proseso sa pagpreparar sa pagkaon ug bisan sa paghipos niini lakip na usab diha sa giinom nga mga tubig. Kinahanglan nga pabukalan ang imnon nga tubig sulod sa lima ka minutos ilabi na kung wala ka nasayod kung asa nagagikan ang tubig.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph