SUNOG ang lawas sa usa ka Criminology student nga napalgan patay lakip ang motorsiklo niini sa ngilit nga dapit sa Kamakawan, Barangay Indahag, siyudad sa Cagayan de Oro, niadtong Biyernes, Mayo 17.
Gituohang gidabdab ang lawas ni Marjun Mejos, 21, taga Barangay Bonbon sa maong siyudad ug nagtungha sa usa ka unibersidad.
Sa inisyal nga imbestigasyon sa Scene of the Crime Operatives- Northern Mindanao pinaagi kang Police Liutenant Paul Jean Ragmac nga posibleng gipatay una si Mejos ayha kini gidabdaban.
“Sa assessment, gipatay ni siya before gisunog kani iyang samad fatal kini, murag gibunalan nga pointed object ang gamit murag bara,” matud ni Ragmac.
Sunog ang gisul-ob nga jacket, rubber shoes lakip na ang motorsiklo nga distansya sa iyang nahimutangan, dugang ni Ragmac.
Dunay samad sa iyang dagway ug likod ang biktima nga gitouhang gibunalan gamit ang hait nga buntang hinungdan sa hinanaling kamatayon.
Nagtoo usab ang mga higala ug mga klasmeyt nga natripan lang si Mejos tungod wala kini silay kasayoran nga duna kini kontra ug nakurat nalang sa kamatayon niini.
Nagpadayon pa ang kapulisan sa imbestigasyon ug duna nay person of interest ilabi na nga niadtong nilabay nga tuig duna kini nakabingkil, kinsa misulay sa pagdunggab kaniya, apan nabawi niini ang kutsilyo ug kini ang nakadunggab nga miresulta sa pagkalanding sa ospital sa kontra niini.
Gipalawman pa ang imbestigasyon karong mga panahona aron masuta kung kinsa ang responsable sa maong niluog nga krimen.
Sa pagkakaron ang patay nga lawas ang anaa sa Bollozos Funeral Homes sa Bulua sa siyudad sa Cagayan de Oro.