USA ka security guard gipasakaan og kaso nga homicide sa kapulisan human napatay ang usa ka 22 anyos lalake nga giila sa kapulisan nga notadong kawatan.
Si Elmer Mediana, 36, taga Barangy Media Once, Siyudad sa Toledo, napriso sa Casuntingan Police Station human napusilan ug napatay ang usa ka Junrey Alinsug, taga sitio Malibo, Barangay Subangdaku, Mandaue City.
Si Mediana nagbantay sa Hafele Phils. Inc. nga nahimutang sa L. Jaime street, Barangay Maguikay, sa dakbayan.
Matud ni Police Colonel Julian Entoma, director sa Mandaue City Police Office (MCPO) nga pasado alas 3 Dominggo sa kaadlawon, Mayo 19, giingong nasakpan ni Mediana si Alinsug sulod sa compound sa establisemento.
Gisita si Alinsug ni Mediana, apan giingon nga kalit hinuon siyang gidunggab niini gamit ang screw driver hinungdan nga iyang gipusil.
Dali gihapon nga nakadagan si Alinsug ug nipara og taxi.
Si Alinsug ang giingong nimando pa sa driver nga magpahatud sa labing duol nga tambalanan, apan diha pa lang sa dan MC Briones, Barangay Bakilid wa na nitingog si Alinsug dihang gipangutana sa driver.
Sa pagsuta sa driver, wa na kini nagginhawa hinungdan dali siyang nagpakitabang ug nagtawag og pulis.
Samad pinusilan sa iyang dughan, ang namatyan ni Alinsug.
Ni-surrender ra usab si Mediana sa dihang iyang nahibaw-an nga namatay si Alinsug.
Na-recover sa kapulisan ang usa ka screw driver nga adunay gitas-on nga 8 ½ inches ug usa ka bisekleta nga giingong iya ni Alinsug.
Nasakmit usab sa kapulisan ang usa ka 9mm pistol sa gwardiya ug na-recover ang usa ka kabhang sa crime scene.
Trabaho lang
Gipasabot ni Entoma nga ang gihimo ni Mediana mao lang ang pagbuhat sa iyang trabaho, pag-proteher sa gibantayan nga establisemento.
Apan bisan pa, matod ni Entoma nga mahimo kini nga makapangita og paagi nga di mapatay si Alinsug hinungdan nga gipasakaan gihapon og kaso nga homicide.
“We understand that he is just doing his job, protecting the establishment. Pero kon mahimo gyud, i-neutralize, masikop nimo ang kawatan nga dili mapatay. Pero kay naglisud sad siguro siya, kay gidunggab gud unta siya, mao nga dili murder atong i-file, homicide ra,” pagpasabot ni Entoma.
Giangkon usab ni Entoma nga usa si Alinsug sa mga notado nga kawatan sa syudad sa Mandaue.
Lakip kini sa mohimo og akyat-bahay ug mosud og establisemento aron pagpangawat og mga cable o bisan unsa pa.