KONSEHAL Cynthia Remedios tinguha nga mapatukod ang Mandaue City Women's Center, usa one-stop shop kini alang sa mga panginahanglanon sa kababayen-an, gikan sa medical, legal, livelihood ug bisan unsa nga aspeto.
Kini ang gipahibalo ni Remedios, kinsa mao ang chairman sa committee on Women and Family, sa Mandaue City Council, atol sa gipahigayon nga Women’s Summit Lunes, Mayo 20, alang sa libuan ka mga babaye sa dakbayan sa Mandaue.
Matud ni Remedios nga gawas nga aktibo ang mga Gender and Development kon GAD center sa matag barangay sa dakbayan pagtabang sa mga babaye nga gi-abusaran, ning subli siya nga napili nga konsehal sa syudad, paninguhaon niya nga matukod ang center o dili ba kaha opisina nga motutok sa kababayen-an.
Gipasabot ni Remedios nga tungod sa kadaghan nga mga kalihukan ug sa nahitabong adlaw nga piniliay niadtong Mayo 13, hinungdan nga imbes nga niadtong Abril himuon ang maong summit, karon kini nahitabo, hinuon, alang sa konsehala nga matag adlaw, women’s day man.
Si Dr. Rhodora Bucoy, ang chairperson sa Philippine Women’s Commission, mao ang guest speaker kinsa nipahinumdom sa mga katungod sa kababayen-an. (FMD)