DAGHAN ang wala mahimuot sa resulta sa eleksyon. Nangugat ang uban nga dunay nahitabong lapad nga pagpanikas. Ingon niini ang sitwasiyon matag human sa piniliay.
Dili makadawat ang uban gumikan kay wala molusot ang ilang mga kandidato.
Natingala sab sila nganong nakakuha pa og igong boto ang ubang kandidato taliwa sa daghan pasangil batok niini.
Usa sa gipanghimaraot sa uban mao kining kadaogan pagka-senador ni Imee Marcos, anak ni kanhi Presidenti Ferdinand Marcos.
Sukad pa gipalagpot pinaagi sa Edsa Revolution si Presidenti Marcos hangtod sa iyang pagkamatay, wa moundang ang iyang mga kaaway pagpadayag sa ilang kasuko.
Nitakod na gani ilang kalagot ngadto sa mga anak, lakip sa nahiagom mao si Imee Marcos ug si kanhi Senador Bongbong Marcos, ug gani naapil sab si kanhi first lady Imelda Marcos.
Apan, taliwa niining tanang pagpangdaot sa pamilyang Marcos sukad pa kaniadto hangtod karong panahona, nakabaton gihapon og solido nga tigsuporta ang maong pamilya.
Nakamatikod ba kaha ang kadaghanan nga bisan sa nagbaha nga mga akusasiyon batok sa mga Marcos, wala gyud ta makadungog nga mipatol sila.
Gihinganlan sila og “kurakot,” “kawatan,” “mamumuno,” “madaogdaogon,” “walay kaluoy,” ug uban pang kadaotan ug kangil-aran nga nabuhat sa tawo, gihan-ok tanan ngadto kanila.
Pagsugod sa kampaniya, nagkagrabe ang pagpangdaot ngadto sa kandidatora ni Imee Marcos. Gikan sa mga hamtong, estudyanti, ug gani mga kaatbang sa politika, way mapili, naghiusa sila pag-itsa og hugaw batok kang Imee Marcos.
Apan, lahi sa ubang mga kandidato ug politiko, wa gyud mobalos og masakit nga pulong si Imee Marcos. Nabantayan ba ninyo?
Imbes mobanghag si Imee Marcos batok sa mga pasangil, nagpadayon kini sa iyang paghatod og serbisyo ngadto sa katawhan isip gobernador sa Ilocos Norte.
Karon nga napili na gyud siya pagka-senador, nagpabilin gihapon nga hilom siya ug wa gyud mosinghag sa iyang mga kaatbang.
Kadto iyang kontra sa politika, nanimaho na ilang baba sa pagpunay og pangataki, apan dili ta makakita og polido nga serbisyo ngadto sa katawhan.
Kining gipakita ni Imee Marcos dili ba kaha kini paagi sa pagpasantop nga nasayop ang uban sa ilang pasangil batok sa pamilyang Marcos.
Diha sa iyang pamunoan isip kongresista sulod sa tulo ka termino ug gobernador sa ilang probinsiya gipakita niya ang tanang maayong mithi aron mahinumdoman sa publiko ang tiunay nga tumong sa iyang amahan.
Kon tinuod man ang pasangil batok sa pamilyang Marcos, kining gipakita ni Imee Marcos ug uban pang sakop sa mga Marcos nga wa gyud mobalos sa pagdaot sa ilang kaaway, dili ba kaha kini timailha nga sila gusto nang makig-uli sa mga tawo nga nabikil sa iyang amahan, ug sila nag-awhag nga dawaton pagbalik sila niadtong mga tawo nga nakig-kontra sa kanhi presidenti?
Hinumdomi, dili baya mayoriya sa katawhang Filipino ang mituo sa tanang pasangil batok sa mga Marcos. Posibli kaha ang giingong kadaotan sa pamilyang Marcos naa ra makita ug mabasa nato sa mga newspaper ug libro nga gisuportahan sa mga kaaway. Apan diha sa kasingkasing nga kinabag-an sa mga Filipino natisok ang maayong mithi sa mga Marcos.