GIPAHINUMDOMAN sa tinugyanan sa Commission on Election (Comelec) ang tanang mga kandidato nga magduso na sa ilang mga Statement of Contributions and Expenditures (Soce) hangtod Hunyo 13.
Nasayran nga ang tanan nga mga nagduso sa ilang kandidatora niadtong nilabay nga eleksyon kinahanglan nga magduso na sa ilang Soce tungod dunay tukmang aksyon sa mga dili makaduso niini human sa Hunyo 13.
Gibutyag ni abogado Ramil Acol, city election officer sa city Comelec, nga posibleng dili na makahupot og posisyon sa gobyerno ang mapakyas sa pagduso sa Soce.
“Required sila tanan, ang sanction election offense either imprisonment or fine then possible disqualification to run or hold further government office or position,” matud ni Acol.
Nasayran nga ubos sa Republic Act 7166, kinahanglan nga ang kandidato nga nakadaug sa nasyonal ug lokal nga eleksyon dili kini makalingkod hangtod nga masumiter niini ang Soce.
Giingong kinahanglan nga sulod sa 30 ka adlaw human sa eleksyon kinahanglan nga maduso na ang Soce.