NAGKINAHANGLAN pa og duha ka mga overtime ang host Toronto Raptors una nila nabawsan ang Milwaukee Bucks, 118-112, kagahapon sa Game 3 sa Eastern Conference finals series sa National Basketball Association (NBA).
Ang kadaugan maoy nakapahak sa bintaha sa Bucks sa best-of-seven series.
Gipangulohan ni Kawhi Leonard ang Raptors pinaagi sa iyang 36 puntos diin walo niini iyang namugna sa krusyal nga ikaduhang overtime.
Tataw nga aduna na’y gipamati si Leonard sa iyang tiil gumikan sa kakapoy apan iya kining giagwanta.
“I mean, it’s 52 minutes and it’s in the playoffs, so you definitely feel it. When you play 30 minutes, you feel it still,” pasabot ni Leonard. “Just got to not worry about it, get my treatment and move on to the next one.”
Si Pascal Siakam nidugang og 25 puntos alang sa Raptors samtang niamot og 19 puntos si Norman Powell. (AP, ESL)