SUWAYAN pagharos og daog sa back-to-back defending champion Golden State Warriors ang Western Conference finals sa National Basketball Association (NBA) sa ilang pagpakigsangka og balik sa host Portland Trail Blazers sa Game 4 sa best-of-seven series sugod karong alas 9:00 sa buntag (RP time).
Bisan wala ang usa sa ilang pambato nga si Kevin Durant, kinsa kasamtangang nagpaalim sa iyang angol sa tiil, ang Warriors nakamaneho lang gihapon pagposte’g kadaugan sa nag-unang tulo ka mga duwa sa series.
Ang kadaugan karon sa Warriors mao ang makatukmod kanila sa ikalima nilang sunodsunod nga pagtaak sa NBA Finals.
Apan ning higayuna, gilaumang dili sayon ang tanan alang sa Warriors gumikan kay gawas nga wala si Durant, dili sab makapakita og aksyon ang usa sa ilang sinaligan nga si Andre Iguodala.
Si Iguodala nakasinati og angol sa iyang wala nga tiil sa sayong bahin sa yanong kadaugan, 110-90, sa Warriors sa Game 3.
Hinuon bitbit ang 3-0 nga bintaha sa series, seguradong grabe ka taas sa moral sa Warriors.
Sa kasaysayan sa NBA, wala pa’y team nga nakabangon gikan sa 0-3 sukad masukad, Adunay tulo nga nakapugos og deciding Game 7 apan napakyas ra gihapon.
“Over the course of the regular season, we talked about [how] everybody was going to have an opportunity to win a championship,” matod ni Warriors superstar guard Stephen Curry.
“This series has been a true testament to that.”
Si Curry kauban sila si Klay Thompson ug Draymond Green mao ang mangulo sa Warriors.
Sa laing bahin, nagkanayon ang usa sa mga sinaligan sa Trail Blazers nga si Damian Lillard nga nakasinati siya og angol sa iyang gusok sa Game 2 sa series nga iya lang giagwanta ang kasakit.
Gibutyag kini ni Lillard pagkahuman na sa ilang kapildihan sa Game 3 apan iyang gitataw nga wala ra kini nakaapekto sa iyang duwa.
“I don’t think it’s something that’s affecting my game. It’s there... Obviously you feel it, but that’s it,” pasabot ni Lillard.
Sama sa kadaghanan sa mga sakop sa Trail Blazers, ang duwa ni Lillard mingbahar sa mga 3rd quarter ning maong series.
Naangkon ni Lillard ang iyang angol dihang natumbahan ni Golden State center Kevon Looney ang iyang gusok atol sa ilang pag-inilugay sa saag nga bola sa 3rd quarter sa Game 2. (AP, ESL)