NAGTUO si Hall of Fame trainer Freddie Roach nga makasugat og malisod nga away si Filipino boxing superstar Manny Pacquiao batok kang American Keith Thurman sa ilang world title fight karong Hulyo 20 sa MGM Grand Garden sa Las Vegas, USA.
Gipasabot ni Roach, kinsa co-trainer ni Pacquiao, nga iyang gitun-an ang dagkong mga away ni Thurman lakip na niini ang labing ulahi diin midaog kini batok kang Joselito Lopez pinaagi sa desisyon niadtong Enero 26.
Mao kini ang labing unang away ni Thurman human siya nipahuway og duha ka mga tuig.
Gilauman nga yano ra untang modaog si Thurman ning awaya apan nakasinati sab siya’g mga bun-og nga timailhan nga natay-an na sab ang iyang abilidad.
Hinuon giklaro ni Roach nga dili angayang molugak si Pacquiao tungod kay seguradong mangandam og insakto si Thurman aron hingpit nga mahibalik ang iyang abilidad atol sa pagpakig-away niini sa Pambansang Kamao ng Pilipinas.
“Thurman is a big, strong guy but his last two fights he hasn’t looked as good as he once was. But I won’t underestimate him and I’ll expect him [to] come with his best because he’s fighting one of the best,” matod ni Roach sa interbyu sa www.boxingscene.com.
Hinuon, dako ang pagsalig ni Roach nga mopatigbabaw ang fighting senator sa Pilipinas ning awaya.
Sa tan-aw ni Roach, dili makasugakod si Thurman gumikan sa kaabtik ni Pacquiao.
“We do have a tough fight in front of us. It’s a winnable fight but Pacquiao’s speed should be too much for him,” dugang ni Roach.
Si Pacquiao (61-7-2, 39KOs) maoy naggunit sa World Boxing Association (WBA) welterweight title samtang si Thurman (29-0, 22KOs) maoy naghupot sa ‘super world’ title nga bersyon niini. (ESL)