NAKURAT si Noy Israel ning buntaga dihang may mitawag kaniya. Kusog kini kaayo. Mihunong siya pagbugwal sa tabunok nga yuta nga tamnan unya niyag mga lagutmon, sama sa apali, kamote, gabi ug uban pa.
“Tay!” sangpit ni Tisoy. “May suwat kong nadawat didtos tabo! “ Si Tisoy mihangak sa kakutas.
Gisugo ni Noy Israel si Tisoy pagbaligya sa mga lagutmon sa tabo kaganina sayo sa buntag. Ug karon mipauli kini nga may dalang suwat Gihatag ni Tisoy ang suwat ngadto sa iyang amahan.
“Imbitasyon kini, Tisoy!” matod ni Noy Israel, “para sa ika-26 nga sumad sa adlawng natawhan sa anak dalaga nilang Don Mateo ug Donya Rebecca.
Daghan nang mga higayon nga gi-imbitar sila sa adunahang magtiayon sa lainlaing okasyon, apan wala hatagi og pagtagad ni Noy Israel. Wala pa mapapas sa iyang hunahuna nga may kalambigitan ang adunahang magtiayon sa pagdagit sa iyang anak nga babaye, maguwang ni Tisoy, dihang nagpanuigon pa kinig usa ka tuig. Dako ang iyang pagtuo nga si Blesilda, anak nilang Don Mateo ug Donya Rebecca, mao gyud ang anak nila ni Nang Wanita. May nakasulti kaniadto kaniya nga si Donya Rebecca dili makahatag og liwat kang Don Mateo, kay kini may diperensiya kuno sa matris. Apan unang pagkahitaboa nga nanganak man kini og babaye nga sama ang panuigon sa gidagit nilang anak. Aron pagsuta kon ang gianak ni Donya Rebecca mao ba ang ilang anak ni Nang Wanita, miadto sila sa harianong balay sa magtiayon, apan giabog sila sa guwardiya Gibitad sila sa guwardiya paingon sa gawas ug gihulga nga patyon kon mobalik sila. Gidutlan sila sa kalisang ug misaad nga dili na mopakita nilang Donya Rebecca ug Don Mateo.
Apan sa pagpanglabay sa katuigan nabali ang mga panghitabo kay ipatawag man sila sa adunahang magtiayon, ilabi na kon may okasyon. Gusto nang makigkita kanila si Don Mateo ug Donya Rebecca ug daw may buot kining ibutyag ilabi na nga milampos si Blesilda sa pagka doktots. Apan wa manumbaling niini sila si Noy Israel ug Nang Wanita. Nagtuo sila nga pagpaka-aron ingnon lang tanan pagtagad sa adunahang magtiayon. Apan sa kadugayan, sama sa batong bantilis nga mohumok sa kanunay nga pagtulo sa ulan, mihumok ang balatian nilang Noy Israel ug Nang Wanita. Gisanong nila ang ulahing imbitasyon nilang Don Mateo ug Donya Rebecca.
NIANANG pagka buntag sa adlaw nga gitakda sa imbitasyon nangadto sila si Noy Israel, Nang Wanita ug si Tisoy sa harianong panimalay nilang Don Mateo ug Donya Rebecca alang sa dakong piging sa ika-26 nga sumad sa adlawng natawhan ni Blesilda.
Nagsugwak ang mga bisita sa sulod ug sa lagwerta sa balay sa ilang paghiabot. Ang mga bisita pulos mga adunahan. Gibati nila ang tumang kaulaw, kay bisan usa way mitagad kanila ug miabi-abi. Gitan-aw sila sa mga bisita. Wala magpakita kanila sila Don Mateo ug Donya Rebecca, lakip na ang ilang anak.
“Hoy, mangayo mog limos?” gisinggitan sila sa guwardiya.
Mobiya na unta sila dihang may misangpit kanila. Milingi sila ug ilang nakita si Don Mateo ug Donya Rebecca, uban si Blesilda. Gipasaka sila sa itaas ug didto nagkulukabildo.
“Gi-imbitar ko kamo aron saw-an ang dakong kumbera sa adlaw nga natawhan ni Blesilda. Panahon na sab nga ipaila namo kang Blesilda ang tinuod niyang ginikanan,” ni Don Mateo.
“Gilukat namo si Blesilda sa mga kamot sa mga kidnaper sa dakong kantidad nga salapi nga ilang gipangayo bugti sa iyang kaluwasan. Panahon na nga ibalik namo siya kaninyo, Noy Israel ug Nang Wanita, kay kamo ang tinuod niyang ginikanan, bisan supak sa among kabubut-on kay giisip man namo siya nga tinuod namong anak,” ni Donya Rebecca nga luhaan ang mga mata samtang namulong.
“Dili namo bawion si Blesilda gikan kaninyo, Donya Rebecca,” ni Noy Israel. “Igo na kanamo nga nailhan namo ang among anak ug nakaila sab siya kanamo nga tinuod niyang ginikanan.”
Miduol si Blesilda nilang Noy Israel ug Nang Wanita ug migakos kanila nga nagpahiyom samtang miagay gikan sa iyang mga mata ang mga luha. (KATAPUSAN)