DUNGAN nga gisalida ang “Kuwaresma” ni Sharon Cuneta ug “Between Maybes” nilang Julia Barretto ug Gerald Anderson niadtong Mayo 15.
Apan sama sa kadaghang mga pelikulang Tagalog nga nagmika karon sa takilya, mao sad ni ang nahitabo.
Ang “Between Maybes” naka-P2 million ra sa opening day samtang ang “Kuwaresma” mas gamay pa pero wa gianunsyo kon pila.
Lahi kaayo sa unang mga panahon nga magpista ang masa.
Karon maihap na lang sa tudlo ang mga pelikulang Tagalog nga dunay desenteng kita sa box office.
Gilangaw
Laing gilangaw karong buwana ang “Maledicto” nilang Tom Rodriguez ug Jasmine Curtis Smith nga gisalida niadtong Mayo 1.
Maorag duha o tulo ra ni ka adlaw sa mga sinehan kay way nanan-aw. Mao sad ang “Man and Wife” nilang Gabby Concepcion ug Jodi Sta. Maria nga “never heard” na.
Dihang nitan-aw ko sa “Sons of Nanay Sabel” ni AiAi delas Alas ug sa Ex-Battalion niadtong Mayo 8 ako ra sang usa sa sinehan.
Comedy siya pero laay tan-awon kay way nagtikawtikaw.
Makabawi ra
Nahibong tingali mo nganong daghan gihapong producer ang mosugal nga mohimog pelikulang Tagalog luyo sa kahimtang karon sa atong industriya?
Salamat sa mga Cable TV ug online shows sama sa I Want sa ABS-CBN ug Netflix nga maoy nakatabang karon sa mga producer pinaagi sa mga pay per view.
Ang Netflix dunay 109 million users gikan sa 190 ka mga nasud. Sa kadaghang Pinoy sa kalibutan siguradong duna gyuy market.
Hollywood
Basin ganahan mong motan-aw duna pa’y laing pelikula si Ai-Ai delas Alas nga showing ugma, ang “Kiko En Lala.”
Usa ni ka comedy movie nga gibituonan sa Kapuso stars Super Tekla, Kim Domingo, Kiray Celis, Jo Berry ug uban pa.
Showing sad sa Mayo 29 ang “Quezon’s Game” ni Raymond Bagatsing ug Rachel Alejandro.
Sama na sa akong gikaingon niadto nga maayo untag ila ning paubsan ang ilang pulta. Makig-compete man gud sila sa presyo sa Hollywood movies.
Pareho karon mas kusog ang “John Wick” ni Keanu Reeves, dayon ugma showing sad ang “Aladdin.”