NIDAKO pagsamot ang posibilidad nga si Davao City Mayor Inday Sara Duterte-Carpio maoy sumosunod ni Presidente Rodrigo Roa Duterte sa Malacañang.
Moguwa karon nga si Inday Sara maoy labing una ug lig-on nga contender alang sa pagka presidente.
Tungod kini sa gipakitang kalig-on sa iyang partido nga Hugpong ng Pagbabago (HnP) sa nasudnong arena.
Napakita man gud sa HnP nga wala mabungkag ang koalisyon niini tali sa mga lokal nga lider nga nakadaog.
Tinuod dunay mga lokal nga lider ang HnP nga napildi sama ni Mandaue Mayor Luigi Quisumbing, apan nasiguro ko nga inig abot sa panahon, ang PDP-Laban nga gipangulohan ni Governor-elect Gwen Garcia anha na niya mosuporta.
Hinuon, duna lang gyuy mga bakikaw nga kahimtang, sa akong tan-aw. Pananglitan, napildi didto sa Davao City si Tony Boy Floirendo ug mobalik sa Kongreso gikalagutan ni Inday Sara nga si kanhi Speaker Bebot Alvarez.
Sa Bohol, all-out support si Inday Sara kang Cabsec Jun Evasco apan ang nakadaog mao ang kandidato ni Speaker Gloria Macapagal-Arroyo nga si Governor-elect Arthur Yap.
Si GMA maoy gisuportahan ni Inday Sara batok kang Alvarez.
Sa laing bahin, kinsa man ang mga posibleng kaatbang ni Inday Sara?
Dako ang posibilidad nga modagan ang pangbato sa Liberal Party nga si Bise Presidente Leny Robredo. Duna say mga spekulasyon sa posibilidad nga modagan sab si Sen. Grace Poe, Sen. Cynthia Villar, Sen. Manny Pacquiao, ug usa sa mga Marcos.
Hinuon, sa pagkakaron makaingon kita nga layo pa ang 2022 ug immediate agenda mao ang pederalismo.
Nanugsog
Masabtan man nga motukar ang hambug niining mga tigsuporta sa makadaog sa piliay.
Apan naa lang gyuy pipila nga ang reaksyon sukwahi lang gyud sa gipamulong sa ilang kandidato sa wala pa ang piliay.
Wa man nako gitago nga nipabor ko kang Mayor Tomas tungod sa iyang panglantaw alang sa Syudad sa Sugbo.
Ako sab nga nasabtan sa gipamulong ni Mayor-elect Edgar Labella sa debate nga siya magnanimous ug di madinumtanon.
Bisan pa man, lahi ang taras sa pipila niya ka mga tigsuporta online. Magsigi og panugsog nga daog na sila. Wa pa gyud mahuwasi tawn.
Dayon naay mga masuko kon maghisgot og mga mangil-ad nga panghitabo sa piliay. Murag grabi ka insecure nga molutaw nga di diay ligdong ang maong kadaugan. (@anol_cebu sa Twitter)