Espinoza: Dakong Kausaban

MILAMBO. Dako na ang paglambo sa lungsod ug sa probinsya nga akong natawhan. Niadtong miaging weekend nauli ko sa akong lungsod sa Cagwait, Surigao del Sur aron pagtambong sa renewal of vows ni Burt Janz ug Jocelyn Espinoza, akong ig-agaw, nga nanguli gikan sa New Hampshire, USA aron sa pagsaulog sa Ilang adlaw sa kasal didto sa Tandag City, Surigao del Sur.

Gikan sa Butuan City padung sa Surigao del Sur sakay sa van hapit di ko motuo nga ang dalan nga among gisubay og agi sementado na nga sa akong pagbiya niadtong panahon nga moeskuyla na ko sa kolehiyo dinhi sa dakbayan sa Sugbo kining maong mga dalan pulos pa graba. Abog sa panahon sa ting-init ug lapok sa ting-uwan.

Ang akong lungsod diin ko nitapos sa akong elementarya ug high school dako na ang kausaban ug paglambo. Daghan na ang nindot nga kabalayan ug sementado na usab ang mga dalan dungan niini daghan na usab ang mga namuyo nga kon Ikumparar kaniadto maingon nato nga maihap ra sa tudlo ang mga residente.

Ang baybayon nga ginganlan og White Beach, tungod sa iyang puti nga buhangin nga kaniadto sa high school pa ko maoy among suroyan sa barkada kon walay klase bisan kon ang agian tulay lang sa punoan sa lubi nga pinutol. Kaniadto ang among makita mao ra ang pipila ka tawo nga manginhas.

Karon, daghan na ang mga establisamento nga gitukod sa mga negosyante nga taga lungsod ra usab nga dunay yuta nga nag-atubang sa baybayon. Ang among lungsod karon tungod sa White Beach maoy destinasyon sa mga maligo sa dagat sa weekend gikan sa mga silinganan nga lungsod, probinsya lakip na ang mga layo nga dapit.

Gani, akong nahibaw-an gikan sa akong amigo nga si Ping Vasquez nga tag-iya sa usa sa mga kabanas sa beach sa akong pagbisita nga kadtong grupo miabang sa iyang dapit gikan sa usa dapit nga 50 ngadto sa 100 ka kilometro ang gilay-on. Ingon ani na nga kailado ang among lungsod tungod sa White Beach.

Kon ang Palawan dunay mga isla nga suroyan kon gitawag nga “island hopping” para sa mga turista, ang ikaduhang lungsod gikan sa Cagwait ang lungsod sa San Agustin dunay daghan nga gagmay nga isla nga ang dapit ginganlan og Britania, nga sakop sa Brgy. Salvacion, San Agustin.

Sa akong pag-adto sa unang higayon niadtong Dominggo bisan walay mga puti nga turista nga akong nakita apan di ko makatuo nga daghan ang atong mga kaigsoonan nga midagsang sa Britania aron mag island hopping sakay sa pumpboat ug maligo sa dagat igdunggo sa mga isla. Usa sa mga gagmayng isla giganlan og “naked island” tungod kay pulos ra puti nga buhangin ug walay tanum. Hinuon, ang mga nangaligo pulos dunay saput.

Kaniadto sa nagdako pa ko ning among lungsod makaingon ko sa akong kaugalingon nga morag gibiyaan sa Ginoo lakip na ang probinsya bisan pa sa kaadunahan niini sa minerales ug uban pa nga natural resources.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph