DEPARTMENT of Interior and Local Government (DILG) sa probinsiya sa Sugbo nangandam na alang sa pagbansay-bansay sa bag-ong napili ug bisan niadtong re-elected officials.
Apan ang traning alang sa pagpadagan sa pangagamhanan di pa diha-diha ipahigayon.
Si DILG provincial director Jerome Gonzales niingon nga ang Local Government Training Academy sa ilang ahensiya maoy motutok sa training alang sa mga napiling opisyal sa miaging eleksiyon.
Matod niya, ang pagbansay-bansay di lamang alang sa bag-ong mga opisyal kundi bisan niadtong nasubli-an o kaha nakadaog sa lain o bag-ong posisyon.
Wa pa hinuoy schedule alang sa mga opisyal sa Sugbo, apan gipahibawo ni Gonzales nga labing siguro mahitabo inig human na sa pag-asumir sa mga nakadaog sa piniliay karong Hulyo.
Unsay kat-unan
Lakip sa kinahanglang kat-unan sa mga opisyal sa training ang ilang buhaton sa unang 100 ka adlaw sa ilang panerbisyo ingon man ang pagladlad sa ilang executive ug legislative agenda sa tulo ka tuig nila nga termino.
“Bisan ang mga karaan (nga officials), hatagan gihapon sila og checklist sa mga trabahuonon unya unsay mga kinahanglang buhaton within the first 100 days. By that time, ma-set up na ang pangagamhanan. Na-reconstitute na ang mga local special bodies- school board, development councils, including the accreditation of civil society organizations,” pasabot ni Gonzales.
Samtang wa pa ang training, angay tutokan lang una sa mga opisyal ang hapsay nga transition gikan sa mga outgoing ug incoming officials.
Matod niya, importante kini aron mahibawo ang mga bag-ong mosulod nga mga opisyal sa direksiyon, diin nila dalhon ang gidumala nga lokalidad.
Sigun ni Gonzales nga human sa eleksiyon niadtong Mayo 13, usa ka bag-ong hagit na usab ang nagpaabot alang sa mga napili nga mga opisyal.
“Congratulations sa tanang nakadaog. This is a new challenge. Ug unsay naabtan nato sa atong mga LGUs, munisipyo, siyudad, province, atong kat-unan ug asa na sila nga level sa governance,” sigun ni Gonzales. (AZLG)