SUPORTADO sa acting election supervisor sa Sugbo ang tinguha nga mahatagan og overtime pay ang mga magtutudlo nga niserbisyo isip sakop sa Electoral Boards (EB) sa piniliay niadtong Mayo 13.
Human nahatag na ngadto sa mga EB members sa Sugbo ang ilang honorarium, nagpasalamat ang Cebu Provincial Commission on Elections (Comelec) kanila tungod sa sakripisyo pagserbisyo sa eleksiyon.
Ang Alliance of Concerned Teachers (ACT) niawhag sa Comelec nga hatagan og dugang bayad ang mga magtutudlo nga niserbisyo sa miaging eleksiyon human nga matod pa, dili lang usa ka adlaw sila nga niserbisyo.
Giingong ang uban nilapas ug 24 oras sa paghuman sa ilang mga responsibilidad sa piniliay nunot sa pagkaguba sa pipila ka mga vote counting machine, nga niresulta usab sa delay nga transmission sa resulta.
Ang acting election supervisor sa Sugbo nga si Jerome Brillantes nipadayag ug suporta sa maong tinguha nga mahatagan ug dugang bayad o kaha overtime pay ang mga magtutudlo.
Matod ni Brillantes , dili lalim ang giagi-an sa mga magtutudlo atol sa eleksiyon ug nakasabot siya kanila.
Hinuon, wala pa’y tubag komisyon sa apelar sa ACT.
“Mas maayo man na nga matagaan pud sila kay some of them stayed for two days. Kinahanglan gyud siguro nga dapat tagaan sila ug extra compensation for the time that they spent kay dili lalim. I know the feeling or the pressure that they encountered during those days,” padayag ni Brillantes.
Niadtong Biyernes, Enero 17, nasugdan na ang pag-release sa honorarium sa mga EB members dinhi sa Sugbo.
Sa nasayran, ang chairman sa EB nakadawat ug P6 mil nga honorarium, P5 mil alang sa poll clerk ug P4 mil alang sa ikatulong sakop.
“I would like to extend my head full thanks to the Electoral Boards, sa atoang DepEd because without them, our election would not be successful,” sigun ni Brillantes.
Ang mga magtutudlo positibo hinuon nga mahatagan gyud sila sa posibleng dugang bayad nunot sa pagserbisyo sa piniliay.
Si Lizyl Magalona, nga niserbisyo isip EB chairman sa May 13 elections miingon nga dili lalim ang nahimo nilang trabaho ug malipay sila kung mahatagan man gani og extra pay.
Dugang niya, daghan sa mga maestra ang nangapasmo atol sa piniliay aron mahuman gyud ang trabaho.
“Ala una (sa kaadlawon), naa na ko sa school para magkuha sa balota hangtud sunod adlaw sa election, alas 12 nami nahuman. Grabe ang pasmo gyud kay maikog man mi na naa galinya unya mokaon mi. Serbisyo gyud amoa sa mga nibotar ug para sa atong minahal nga Sugbo. Kon mahatagan gani, aw lipay pud kaayu,” dugang pagpasabot ni Magalona sa Superbalita Cebu. (AZLG)