SA PAGSUGOD sa usa ka semana nga Brigada Eskwela kagahapon, Mayo 20, sa dakbayan sa Mandaue, dili lang mga ginikanan, magtutudlo ug tinun-an ang nanglimpyo, kini nalakip sa ubang sektor ug mga kawani sa nagkadaiyang ahensya sa gobyerno sama sa kapulisan ug kabomberuhan, ang nitabang.
Sayo pa lang Lunes sa buntag, Mayo 20, hangtud na sa hapon, bisan sa kainit sa panahon ug kaabog, wa kini panumbalinga sa mga ningtabang sa Brigada Eskwela sa Mandaue City Central School (MCCS).
Ang MCCS usa sa mga tunghaan sa siyudad nga adunay daghang tinun-an. Sa miaging tuig, niabot og 4,100 ug gilantawan nga motaas pa kini karon.
Naabtan sa Superbalita Cebu, ang mag-apohan nga sila si Alma Malinao, 61, ug Alexa Pepito, 11, nga nagtinabangay sa paglimpyo sa bintana, pagpanilhig ug pag-arrangge sa usa sa mga lawak-saringan sa grade 3.
Ang duha, gikan na usab sa grade 7 nga classroom ni Alexa, ug maglimpyo pa usab sa lawak-saringan sa manghud sa grade 1.
“Bisan dili gyud requirement, pero para man sad ni sa akong mga apo, tahud nalang pud ta. Mas maayo man sad gyud limpyo ug andam na daan tanan, aron sugod gyud sila sa klase sa unang adlaw,” saysay ni lola Alma sa Superbalita Cebu.
Sa Barangay Centro, 11 ka tanod ang nitabang sa pagpanilhig ug pangguna sa tag-as na nga mga sagbot sa school ground.
Anaa ang presensya sa pipila ka mga fire truck sa Mandaue City Fire Station sa ubang tunghaan.
Mapasalamaton ang principal sa tunghaan, Claribel Colipapa, nga gawas sa daghan nitabang sa pagpanglimpyo, dunay pipila gikan sa pribadong sektor, organisasyon o institusyon ang nisaad nga mohatag og pintal ug mismo ang mamintal ug uban pa nga tabang nga bisan ginagmay nga bahin.
Gipasabot ni Colipapa nga ang brigada eskwela dili lang sa nagpadulong ang pagbukas sa klase, apan sa tibuok tuig kini, aron pagtabang sa kabataan diha sa maayo nila nga pagkat-on.
Sugod ugma, sugdan na usab sa maong eskwelahan ang pagdawat sa mga buot magpa-enrol, kini aron ma-accommodate tanan, imbes nga sa Mayo 27 pa, kini tungod kay sugod sunod semana usab, mopaubos og Summer In Service Training for Teachers (INSET) ang mga magtutudlo.
Samtang, karon pa nga duha na lang ka semana og magbukas na usab ang mga klase sa kasagarang pampubliko nga tunghaan, Hunyo 3, si Colipapa nihatag og tambag sa mga tinun-an.
“Mura lang ni og gamay nga pahinumdom or tips ba, ang atong mga bata nakabakasyon, so kung bakasyon gani dugay kaayo momata, dugay sad matulog, karong nga week, nindot nga ma-train, maanad ba, pasayuhon nato og mata ang atong mga bata, para dili ma-late, kay we expect that by June 3, everything will be okay na, in place na. And start na gyud ta sa lessons,” tambag sa principal ngadto sa mga tinun-an ug ginikanan o guardian. (FMD)