DI LALIM ang naagian sa 18 anyos nga kanhi suspek sa Silawan murder ug sa iyang pamilya.
Busa alang kang Lapu-Lapu City Prosecutor Ruso Zaragosa, kon siya lang ang pabut-on, mas maayong bahinan sa P1 million nga ganti nga ihatag sa Lapu-Lapu City Government ang 18-anyos.
Ang batan-on unang gipasanginlang maoy nipatay kang Christine Lee Silawan.
Ang ganti unang gisaad sa City Government alang ni bisan kinsang makatabang pagsulbad sa kaso sa linuog nga pagpatay sa dalaga niadtong Marso 10.
Gipasabot ni Zaragosa nga personal ra kini niya nga opinion ug di siya makaawhag sa Siyudad o ba kaha sa kapulisan kalabot sa makadawat sa reward money.
Matod ni Zaragosa nga nakahuna-huna lang siya sa gidangatan sa 18-anyos sanglit iya nakita nga di lalim ang nahiaguman niini dihang siya pa ang gitumbok nga suspek sa pagpatay kang Silawan.
Iyang nakita nga nagkurog ang 18-anyos dihang gidala sa National Bureau of Investigation (NBI) 7 sa iyang buhatan aron pasakaan og kasong murder.
Daghang mga tawo ang nag-atang sa gawas sa buhatan nga gustong motan-aw kaniya niadtong higayuna. Gitaptapan usab ang iyang nawong.
Dihang gihangyo usab niya ang inahan sa 18-anyos nga ipabalik og kustodiya sa Homecare Center sa Dakbayan sa Lapu-Lapu ang anak niini human kini buhii sa kustodiya sa naasoyng pasilidad gumikan sa kamandoan sa piskaliya, nakita usab niya ang kabalaka ug ka-stress sa inahan.
Dunay mga taho nga di lang una pa-eskwelahon sa inahan ang anak karong abli sa klase sa kabalaka nga ma-bully.
“Maayo rapud unta og tagaan para malipay ra pud unya ang bata ug ang inahan nga as if nga wala to nahitabo. Kay di baya pud lalim ang ilang gidangatan atong panahona. Hangyo ra ning akoa. Suggestion lang. Wala ko niingon nga patagaan. At least kaning kwarta nga mahatag pahalipay man gud ni. So, intawn pud tong bata o pamilya ato malipay pud,” matod ni Zaragosa.
Pulis bahala
Si Lapu-Lapu City Mayor Paz Radaza nibutyag nga adto lang niya ihatag sa pulis ang reward money kon mahuman na ang gikinahanglang mga report kalabot sa kinsa ang makadawat sa ganti.
Ang pulis na ang mohatag sa mga nakatabang sa ilang imbestigasyon.
Ang director sa Lapu-Lapu City Police Office (LCPO), Police Colonel Limuel Obon, nibutyag usab nga 16 ka mga tawo ang nakatabang kanila sa pagtumbok kang Renato Llenes, suspek sa pagpatay kang Silawan.
Lima lang niini sa pagkakaron ang ilang priority nga tagaan gumikan sa kadaku sa ilang natabang.